Аҟәа. Хәажәкырамза 13, 2023 шықәса. Аԥсныпресс. Хәажәкырамза 13 рзы Аԥсны Аҳәынҭқарра Ахада Аслан Бжьани ила ишьақәырӷәӷәаз Ауаажәларратә Палата алахәылацәеи хәажәкырамза 10, 2023 шықәсазы Ауаажәларратә Палата аилазаара ахь иалхыз аҭыԥантәи ахаланапхгаратә усбарҭақәа рхаҭарнакцәеи реилатәара.
Аилатәара аҿы Ауаажәларратә Палата аилазаара ҿыц ашьақәыргылара иадҳәалаз азҵаарақәа ирылацәажәеит.
«Ауаажәларратә Палата азы» Азакәан ахәҭаҷ 8, апункт 6 инақәыршәаны, аконкурстә лыԥшаара апроцедура алы Ауаажәларратә Палата аилазаарахь 11-ҩык аполитикатә партиақәеи ауаажәларратә еиҿкаарақәеи рхаҭарнакцәа рыдкылареи хықәкыс иҟаҵаны, Ауаажәларратә Палата алахәылацәа рыла азыҳәамҭақәа ралаҵара аҽҳәареи аконкурстә лыԥшаара амҩаԥгара арыцхәи шьақәырӷәӷәан.
Азыҳәамҭақәа ралаҵара аҽҳәара – хәажәкырамза 13 -24, 2023 шықәса.
Аконкурстә лыԥшаара амҩаԥгара арыцхә – хәажәкырамза 27, 2023 шықәса. ***
Ауаажәларратә Палата шьақәгылоит Аҳәынҭқарра Ахада ишьақәирӷәӷәаз 13-ҩык Аԥсны атәылауааи 11-ҩык араионқәеи ақалақьқәеи рхаҭарнакцәеи рыла; 11-ҩык Аԥсны Аҳәынҭқарра аиустициа Аминистрра аҿы ашәҟәы иҭагалоу аполитикатә партиақәа, ауаажәларра-политикатә еиҿкаарақәеи ауаажәларратә еидгыларақәеи рхаҭарнакцәа.
Аҳәынҭқарра Ахада ила ишьақәырӷәӷәоу Ауаажәларратә Палата алахәылацәа рышьақәырӷәӷәара амш инаркны 10-мыш ирылагӡаны аконкурстә лыԥшаара апроцедура ала аҭыԥантәи ахаланапхгаратә усбарҭақәа рыла зыдгалара мҩаԥгаз 11-ҩык араионқәеи ақалақьқәеи рхаҭарнакцәа Ауаажәларратә Палата аилазаара ҿыц ахь рыдкылара азы аӡбамҭа рыдыркылоит.
Аҳәынҭқарра Ахада ила ишьақәырӷәӷәоу Ауаажәларратә Палата алахәылацәа Ауаажәларратә Палата аилазаара ҿыц ахь ирыдыркылаз 11-ҩык араионқәеи ақалақьқәеи рхаҭарнакцәа рыцны 10-мыш ирылагӡаны аполитикатә партиақәа, ауаажәларра-политикатә еиҿкаарақәеи ауаажәларратә еидгыларақәеи 11-ҩык рхаҭарнакцәа Ауаажәларратә Палата аилазаара ҿыц ахь рыдкылара азы аӡбамҭа рыдыркылоит.
