Аусзуҩцәеи атехникеи разымхара азы
Акадртә зҵаарақәеи иҷыдоу атехника ала аиқәыршәара азҵаареи лассы–лассы ицәырҵуеит, аха Ахылаԥшырҭа иамоу алшарақәа инарықәыршәаны иӡбахоит. Атехника ықәсуеит, иажәуеит, уи аԥсахга хәҭақәа рыхәԥса акыр иазҳаит. Ҳара иаҳҭахуп, иаагозар, ашьха-еиқәырхаратә усурақәа рзы иҷыдоу аиқәыршәагақәа, иара убас иҿыцу аӡысыгатә хархәагақәа. Аминистрра иазоужьу абиуџьет аҳәаақәа ирҭагӡаны аус ауеит, аха ӷәӷәала иҷыдоу аҭагылазаашьақәа раан уи аҳәаақәа рҭыҵра хымԥадатәны иҟалоит. Акадрқәа инарымадангьы ауадаҩрақәак ыҟоуп. Аиҳарак иахьазы иуадаҩны иҟоу иҷыдоу атехника арныҟәцаҩцәа разымхара азҵаара, ахәҭакахьала, Гагра араион аҿы. Уаанӡа ҳара ҳахь аусуразы иадҵаалоз рацәаҩын. Уажәы аҭагылазаашьа аҽаԥсахит. Убри аан аиқәырхаҩцәеи амцарцәаҩцәеи ироуа ауалафахәы ҳаракӡам.
Атуристтә аамҭахәҭа азы.
Атуристтә аамҭахәҭа ҳара есымша даара ҭакԥхықәрала ҳазнеиуеит. Ҳара ҳтәылауаа реиԥш, атуристцәагьы ршәарҭадара еиқәҳаршәоит. Аԥсны иҷыдоу аҭагылазаашьақәа рзы Аминистрра иатәу шәагаала имаҷу аӷбақәа рзы аҳәынҭқарратә Инспекциа аусзуҩцәа аплиажқәа, асанаториақәа, апансионатқәа, асасааирҭатә ҩнқәа гәарҭоит. Ашьхатә туризм, атуристә гәыԥқәа рыиасра амаршрутқәа, урҭ ршәарҭадара аиқәыршәара, уҳәа ирыдҳәалоу азҵаарақәа акыр актуалра рыҵоуп. Лассы-лассы ауадаҩрақәа цәырҵуеит ҽазыҟаҵарада еиҿкаахо, узықәгәӷуа аимадаратә хархәагақәа рыда, цқьа еилкаам ашьхатә маршрутқәа рыла идәықәло атуристтә гәыԥқәа ирыдҳәаланы. Араҟа ҳара аҩныҵҟатәи аусқәа Рминистрреи атуризм аминистрреи ҳаҽрымаданы аус аауеит. Жәаҳәарада, атуристцәа рхыԥхьаӡара еиҳахароуп, аха аԥсшьаҩцәа заҟа ирацәахо аҟара ҳусзуҩцәагьы ирықәыӷәӷәогьы рацәахоит. Ҳара уи еилаҳкаауеит, иҳаду аҭакԥхықәрагьы анагӡара ҳазхиоуп.
Анапхгарабжьаратәи аимадарақәа рзы.
Ҳара иааиԥмырҟьаӡакәа урыстәылатәи ҳколлегацәа ҳаҽрымаҳдоит. Урыстәылатәи Афедерациа Иҷыдоу аҭагылазаашьақәа рзы Аминистрра анаҩс Урыстәыла агәабзиарахьчара Аминистррагьы, ахәҭакахьала акатастрофақәа рмедицина аструктурақәеи ҳареи аусеицура ҳыбжьоуп. Аусеицуразы Амеморандум анапаҵыҩра азԥхьагәаҭоуп, аха уи азы инҭкааны аҽҳәарақәа алкааны иҟам.
Астудентцәа рзы
Иҷыдоу аҭагылазаашьақәа Рминистрра аганахьала Аԥснынтәи 40-ҩык акурсантцәа Урыстәылатәи Афедерациа Иҷыдоу аҭагылазаашьақәа Рминистрра апрофилтә ҵараиурҭақәа рҿы аҵара рҵоит. Рҵара анхдыркәшалак ашьҭахь урҭ рыԥсадгьыл ахь ихынҳәуеит, Аминистрра аппарат хада аҟны еиԥш араионтә ҟәшеиҵақәа рҿы амаҵзура иахыслоит. Урыстәылатәи агани аԥсуа гани ирыбжьарҵаз аиқәшаҳаҭрақәа рыла, ҳтәылауаа рҵара ахықәкытә дкыларала имҩаԥысуеит. Ҳара есымша ҳкурсантцәа ҳаҽрымаҳдоит, апрофилтә ҵараиурҭақәа ҳарҭаауеит, рынхашьа еилаҳкаауеит. Убри аан ицәырҵуа азҵаарақәа зегьы ишьақәыргылоу анормативқәеи аԥҟарақәеи инарықәыршәаны иӡбахоит.
