Аҟәа. Хәажәкырамза 16, 2023 шықәса. Аԥсныпресс. 1992 – 1993 шш. Аԥсны жәлар рџьынџьтәылатәи еибашьра аан афронт иаԥныз Алада Ешыра ақыҭан Аҟәа ақалақь ахақәиҭтәра азы имҩаԥгаз Марттәи ажәылара 30 - шықәса ахыҵра иазкны агәалашәаратә усмҩаԥгатә мҩаԥысит.
Еизаз минуҭктәи аҿымҭрала иҭахаз аиабашьцәа ҳаҭырла иргәаладыршәеит.
Ашколхәыҷқәа аибашьра иазку ажәеинраалақәа ирыԥхьеит, марттәи ажәылара хаҭала иалахәыз аибашьра аветеранцәа хәажәкырамза 15 -16, 1993 ауха иалагаз ажәыларатә операциа азы ргәалашәарақәа еизаз ирзеиҭарҳәеит.
Аԥсны Актәи Ахада Владислав Григори-иԥа Арӡынба Имемориал амҵан ишьақәыргылаз аекран аҿы еизаз идырбан хәажәкырамза, 1993 шықәсазтәи авидеохроника.
Иҭахаз аибашьцәа ргәалашәара ахьӡала ажәҩан иаларҵеит 222 фонар, иара убас Марттәи ажәылара аҿы иҭахаз аибашьцәа рхыԥхьаӡара иақәшәо ацифра 222 асахьа аманы иргылаз ацәашьқәа адыркит.
Марттәи аоперациа 30-шықәса ахыҵра иазку акциа еиҿнакааит аҿари аспорти русқәа рзы аҳәынҭқарратә Еилакы.
