Аԥсны аҳҭнықалақь Аҟәа ахақәиҭтәра азы имҩаԥгаз Марттәи ажәылара аҿы иҭахеит 222 –ҩык аԥсуа ар аибашьцәа, шәҩыла еиуеиԥшым ахәрақәа роуит, 23-ҩык хабарда ибжьаӡит.
16.Хәажәкыр.2023
АҞӘА МАРТТӘИ АЖӘЫЛАРААН ИҬАХАЗ ҲАҬЫРЛА ИРГӘАЛАДЫРШӘЕИТ.
Аҟәа. Хәажәкырамза 16, 2023 шықәса. Аԥсныпресс. Аҟәа 1992-1993 шш. Аԥсны жәлар рџьынџьтәылатәи еибашьра Марттәи ажәылараан иҭахаз ҳаҭырла иргәаладыршәеит.
Ашьыжь, хәажәкырамза 16 рзы, Аԥсны Аџьынџьтәылатә еибашьраан (1992-93шш), Аҟәа ахақәиҭтәразы имҩаԥысыз марттәи ажәылараҟны иҭахаз рбаҟа амҵан ашәҭшьҭаҵара иазкыз ацеремониа мҩаԥысит.
Уи иалахәын Аҳәынҭқарра Ахада ихаҭыԥуаҩ Бадра Гәынба, аԥыза-министр Алеқсандр Анқәаб, Ахада Иусбарҭа анапхгаҩы Џьансыхә Нанба, аԥыза-министр ихаҭыԥуаҩ, афинансқәа рминистр Владимир Делба, Аԥсны иҟоу Урыстәыла Ацҳаражәҳәаҩ Михаил Шургалин, аибашьра аветеранцәа, хатәгәаԥхарала еибашьуаз, Апарламент адепутатцәа, аиҳабыра, аӡбаратә уаажәларра рхаҭарнакцәа, ауаажәларра.
