Аҟәа. Хәажәкырамза 16, 2023 шықәса. Аԥсныпресс. Аԥсны атуризм аминистр Ҭеимураз Хишба напхгара зиҭо аԥснытәи аделегациа атуризми асасдкылара аинидустриеи рзы XXIX Жәларбжьаратәи ацәыгақәҵа MITT – 2023 иалахуп. Уи мҩаԥыслоит хәажәкырамза 16 инаркны 18 - нӡа Москва ақалақь, Жәларбжьаратәи ацәыргақәҵатә центр «Крокус Экспо» аҿы.
Аԥснытәи аделегациа аилазаара аҿы иҟоуп еиуеиԥшым атуристтә еилазаарақәа, атуристтә операторцәа, Аԥсны атрансферқәеи аекскурсиамҩаԥгаҩцәеи рзанааҭеидгылақәа рхаҭарнакцәа.
Аԥсны еицырдыруа аҭыԥԥшӡарақәа иреиуоу Гагратәи аколоннада асахьа зманы иҟаҵоу аԥснытәи астенд аҿы ахатәы аалыҵ адгалара мҩаԥнагеит.
«Иахьа аусура иалагеит адунеи аҿы зегь иреиҳау ацәыргақәҵақәа хәба рхыԥхьаӡараҿы иҟоу XXIX Жәларбжьаратәи атуристтә цәыргақәҵа MITT – 2023. Аԥсны араҟа ицәыргақәҵоуп астенд ду ала. Уи хыԥхьаӡара рацәала аҭааҩцәа адҵаалоит. Атуроператорцәа аус руеит, ҳреспублика иазҿлымҳау зегьы аинтерес зҵоу адыррақәа рырҭоит. Ҳара ацәыргақәҵа амҩаԥгара аҳәаақәа ирҭагӡаны аусеицуразы аиқәшаҳаҭрақәак рнапаҵыҩра азԥхьагәаҭаны иҳамоуп. Ареспублика Ҟрым аус ацура азы аиқәшаҳаҭрагьы уахь иаҵанакуеит. Ацәыргақәҵа хымш аус аулоит. Ҳара ҳастенд аусура иалагалоит ашьыжь, асааҭ 10 инаркны. Ҳара 2023 шықәсатәи асезон азы хыԥхьаӡара рацәала асасцәа рҭаарала иалкаахап ҳәа агәыӷра ҳамоуп», - ҳәа ҭелла Аԥсныпресс акореспондент диҿцәажо иҳәеит атуризм аминистр Ҭеимураз Хишба.
Сынтәа MITT - 2023 аҿы ртуристтә потенциал адгалара мҩаԥыргоит 57 урыстәылатәи арегионқәеи 24 тәылеи.
Сынтәа раԥхьаӡа акәны ацәыргақәҵа ахь ааԥхьара роуеит иарбоу аусхкы занааҭла знапы алаку рнаҩс абжьааԥнытәи атуристцәагьы. Урҭ рзы ҷыдала «МITT ахь аныҟәаҩ Имш. Еицааҳартуеит Урыстәылеи иааҳакәыршаны иҟоу адунеи» ҳәа хыс измоу инарҭбаау апрограмма еиқәыршәоуп. Хәажәкырамза 18 рзы аныҟәарақәа бзиа избо зегьы рзы имҩаԥгахоит амастер-классқәа, тревел-блогерқәа рықәгыларақәа еиҿкаахоит, атуристтә курортқәеи урҭ рмаршрутқәеи: еицырдыруа аклассикатә рҟынтәи иҿыцу, шамахамзар џьара иуԥымло аформатқәеи рӡыргара мҩаԥысуеит.
