Аҟәа. Хәажәкырамза 9, 2023 шықәса. Аԥсныпресс. Акультура Аминистрра аконкурстә комиссиа Аԥсны жәлар рџьынџьтәылатәи еибашьра аҿы Аиааира агара Амш 30-шықәса ахыҵра инамаданы аконкурс ахь инагаз зметраж кьаҿу адокументалтә фильмқәа иаарьаҿу рыценариақәа (рсинопсиқәа) быжьба ралхреи урҭ равторцәа хаҭала рԥылареи мҩаԥнагеит, ҳәа иаанацҳуеит Аминистрра апресс-маҵзура.
Аконкурс анаҩстәи аетап ахь анеиразы иалхуп 7 сцераниак.
Ажанр адокументалтә фильм» аҿы иалхыуп ԥшь-сценариак:
Манана Кокоскьериа («Аишьцәа»), Фатима Кәытелиа («Аибашьра ахәыҷқәа»),
Наала Мықәба, Адгәыр Аҩӡба, Давид Ҳашыг («Аибашьреи акультуратә коди»).
Елеонора Гилоиан («Абацәеи аԥацәеи»).
Ажанр «зметраж кьаҿу асахьаркыратә фильм» аҿы иалхуп х-сценариак:
Сабина Харџьелиа (аусуратә хьӡқәа «4 ҭоурыхк» мамзаргьы «Сара исҭахуп ахәыҷра заку здырырц»). Даур Ладариа («Скарабеи»),
Ҭенгиз Џьопуа («Агәаартра»).
Аконкурс ахԥатәи аетап – аҩбатәи аетап иахысыз алахәылацәа рҟынтәи асценариақәа рыдкылара иазкуп.
Лаҵарамза 10 рзы имҩаԥысуеит аԥшьбатәи аетап, араҟа аконкурс аҿы аиааира згаз алкаахоит.
Афильмқәа рҭыхра алагоит лаҵарамза 11 инаркны. Зметраж кьаҿу асахьаркыратә фильм аҭыхразы 300 нызықь мааҭ рҟынӡа инаӡо ҩ-гратк азоужьхоит. Адокументалтә фильм аҭыхразы 400 нызықь мааҭ рҟынӡа инаӡо агрант азоунажьуеит Аԥсны жәлар рџьынџьтәылатәи еибашьра аинвалидцәа Рфонд.
