Аҟәа. Жәабранмза 21, 2023 шықәса. Аԥсныпресс. Жәабранмза 21 рзы иазгәарҭоит аҟыбаҩ ду злаз аԥсуа сахьаҭыхҩы Леуарса Быҭәба иира Амш (21.02.1960 - 17.09.2007).
Аԥсны асахьаҭыхыҩцәа Реидгыла иатәу ацәыргақәҵатә зал Хада адиректор Феисбук иҟоу лдаҟьа аҿы аҟазарадырҩы Алеқсандра Панфилова иааџьаушьаратәы ииашаны асахьаҭыхыҩ иԥсҭазаареи иҟазареи аазырԥшуа лажәақәа аалгеит:
«…Леуарса Быҭәба – акы иаламҩашьо агәырӷьара зцу аҟыбаҩ злоу, аха убри аан зыԥсынҵры кьаҿхаз асахьаҭыхыҩ иоуп. Ус ишыҟалоз идыруан иара. Убри азыҳәан акәхап ас иҷыданы изыҟаз уи идунеи. Уи дахьӡар акәын уи инапы иҵыҵуаз, иара иблала иибоз анашанара ауаа рызнагара…
Иаанхаз уи рзааныжьра. Ацәаҟәа-Анасыԥ цҳаҵас адунеи ахҵара, егьырҭ идырым аблақәа иара Иԥрашхәа баны насыԥ рхыларц. Ҭагалантәи аллеиа иаҵоу аҭынчреи араҳаҭреи знырыз атәым, идырым агәы уажәаԥхьа хара инеиҩуа агәеисыбжь еихсыӷьырц.
Леуарса Быҭәба иԥсҭазаара амҩа кьаҿхеит, ҩынҩажәи быжьба шықәса ирҭагӡахеит ари адунеи аҿы иԥсҭазаара аҽҳәара. Аха уи адунеи иазаанижьит акы иаламҩашьо, шамахамзар џьара иуԥымло, инашану иԥштәеилазаара. Иара убас уи адунеи иазаанижьит даара ирацәаны аразреи абзиабареи - ижәга, иара уи дазыразуп!» ***
