Тарас Ҳагба Аԥсны имҩаԥгахо ашахматтә турнирқәа есышықәсы иалахәхо рхыԥхьаӡара ахьацло даара ибзиоу ахәшьара аиҭеит.
«Атурнир еицырдыруа ашахматасыцәа, жәларбжьаратәи агроссмеистерцәа рхы ахьаладырхәуа уи астатус ахьынӡаҳараку аанарԥшуеит»,- ҳәа иазгәеиҭеит иара.
Аҿари аспорти русқәа рзы аҳәынҭқарратә Еилакы анапхгаҩы ҿыц ашахматқәа аринахысгьы адгылара шроуо азгәеиҭеит. Уи атурнир иҳараку аҩаӡара аҿы имҩаԥысырц азы илшо зегьы ҟазҵо Аԥсны ашахматқәа Рфедерациа апрезидент Константин Ҭыжәба иусуразы иҭабуп ҳәа еиҳәеит.
Урыстәыла Аладатәи Афедералтә Округ ашахматтә Федерациа апрезидент Николаи Ширшиков атурнир алахәылацәа икомпромисдоу аиндаҭлареи иԥшӡоу ахәмарреи рзеиӷьаишьеит. Уи иара убас атурнир аиҿкааҩцәа аусмҩаԥгатә азы иаԥҵоу аҭагылазаашьа бзиа азы иҭабуп ҳәа реиҳәеит.
Аԥсны аҿари аспорти рызҵаарақәа рзы аҳәынҭқарратә Еилакы Аԥсны Амилаҭтә Банки Тамшь ақыҭа иалҵыз – Аԥсны Афырхацәа ргәалашәара ахьӡала аҳамҭақәа аԥырҵеит. Аҳамҭақәа ранашьара мҩаԥигеит Аԥсны ашахматқәа Рфедерациа апрезидент Константин Ҭыжәба.
Аԥсны Афырхаҵа Аслан Занҭариа игәалашәара иазку аҳамҭа ианаршьеит Кисловодск ақалақь аҟынтәи жәларбжьаратәи агроссмеистер Павел Смирнов.
Аԥсны Афырхаҵа Сҭеԥан Занҭариа игәалашәара иазку аҳамҭа ианашьахеит Урыстәыла Аладатәи Афедералтә Округ ашахматқәа Рфедерациа апрезидент Николаи Ширшиков.
Аԥсны Афырхаҵа Даур Занҭариа игәалашәара иазку аҳамҭа ианашьахеит Чечентәылатәи Ареспублика ашахматқәа Рфедерациа апрезидент Ихаҭыԥуаҩ Руслан Иандарбиев.
Уи атурнир аиҿкааҩцәа ианаршьаз аҳамҭа азы иҭабуп ҳәа раҳәо иазгәеиҭеит: «Аԥсны аҭоурых адраматизм ала игәылҭәаауп. Сара гәык-ԥсыкала Аԥсны иазеиӷьасшьоит аҿиара, ашәҭыкакаҷра, аԥсҭазаара ԥхьаҟа ицо, ашахматқәагьы аҿиара бзиа роуа иҟалааит».
Аԥсны Афырхаҵа Заза Занҭариа игәалашәара иазку аҳамҭа ланашьахеит урыстәылатәи ашахматасыҩ, Краснодартәи атәылаҿацә ачемпионка, Урыстәыла еицырдыруа аблогер, ашахматтә онлаин-стример, YouTub-канал Maiami Chess амҩаԥгаҩ Маиа Порожниак. Уи «Мисс фестиваля» ҳәа ахьӡ лыхҵахеит.
Шьахәлаҵәҟьа инарыгӡаз аԥсуа кәашарақәа рыла еизаз зегьы ргәалаҟазаара шьҭырхит ахәыҷтәы рҿиаратә коллективқәа ҩба.
Тамшь ақыҭантәи аҭыԥҳацәа рыквартет ҳаамҭазтәи акәашарақәарыла иқәгылеит, Еснаҭ Сангәлиа инапхгарала адауласыҩцәа рансамбль – кавказтәи аритмқәа нарыгӡеит.
Афото Ельза Ҷанба.
