Аҟәа. Жәабранмза 19, 2023 шықәса. Аԥсныпресс. Жәабранмза 18 – 20 рзы Волгоград ақалақь аҿы имҩаԥысуеит иаарту ачемпионати карате кекусинкаи азы Волгоградтәи аобласт аԥхьахәгареи «Сталинградская Битва» .
Аицлабрақәа рхы аладырхәуеит Урыстәыла арегионқәа 9, иара убас Аԥсни рҟынтәи 200-ҩык инарзынаԥшуа аспортсменцәа. Аԥсны ахьӡала иқәгылоит 18-ҩык Агәыӡера аҳаблеи Очамчыра ақалақьи рҟынтәи Аԥсны карате кекусинкаи Афедерациа аҟәшақәа аспортсменцәа.
Аԥснытәи аспортсменцәа иранашьахеит еиуеиԥшым аҭыԥқәа шааныркылаз азы 15 медал, ҳәа адырра ҟанаҵоит Аԥсны аҿари аспорти рзы аҳәынҭқарратә Еилакы.
Агәыӡера аҳабла аҟынтәи Аԥсны карате кекусинкаи Афедерациа аҟәша аспортсменцәа ахьтәы медалқәа быжьбеи араӡны медалки ранашьахеит.
Актәи аҭыԥқәа ранашьахеит: Давид Аџьынџьал, Лера Џьалаӷониа, Роберт Карапетиан, Алеқсандра Павлова, Елина Глушкова, Руслан Карапетиани Арианна Мартиросиани.
Аҩбатәи аҭыԥ ааникылеит Глеб Ноикин.
Аспорсменцәа азыҟаиҵоит Аԥсны аспорт азҟаза, карате кекусинкаи азы Аԥсны зҽаԥсазтәыз азыҟаҵаҩ Ҭемыр Ҷыҭанаа.
Акоманда афинанстә цхыраара анаҭеит Гәылрыԥшь араион Ахадара.
Очамчыра ақалақь аҟынтәи Аԥсны карате кекусинкаи Афедерациа аҟәша аспортсменцәа ҩба-ҩба ахьтәы медалқәеи аџьаз медалқәеи ранашьахеит.
Актәи аҭыԥқәа ааныркылеит Самир Џьиганиеи Сандро Џьаӷмазиеи.
Аҩбатәи аҭыԥқәа ааныркылеит Баграт Аршба, Русҭам Џьопуеи Данила Домбаеви.
Атурнир аџьаз медалқәа ранашьахеит Алмас Ҭарбеи Демиан Лепсаиеи.
Аспортсменцәа азыҟаиҵоит карате кекусинкаи азы Аԥсны аспорт азҟаза Зураб Мурадиан.
