Аҟәа. Жәабранмза 18, 2023 шықәса. Аԥсныпресс. Иахьа Гәылрыԥшь араион Маҷара ақыҭа акультура Аҩны аҿы Аԥсны аерманцәа Реилазаара аизара Ду мҩаԥысит.
Аизара Ду алагаанӡа аделегатцәа 1992 – 1993 шш. Аԥсны жәлар Рџьынџьтәылатәи еибашьра аҿы иҭахаз рбаҟа амҵан ашәҭ шьыҵәрақәа шьҭарҵеит.
Амшхәаԥштә иалагалан азҵаарақәа ҩба: 3 шықәса ирылагӡаны имҩаԥгаз аусура азы аҳасабырбеи ауаажәларратә еиҿкаара ахантәаҩы иалхреи.
Аерманцәа Реилазаара аизара Ду ааиртит Ахеилак алахәыла Хачик Минасиан. Иара Аҳәынҭқарра Ахада Аслан Бжьаниа ихьӡала адныҳәаларатә шәҟәы аԥхьаразы ажәа ииҭеит Аҳәынҭқарра Ахада Иусбарҭа анапхгаҩы Џьансыхә Нанба.
Аҳәынҭқарра Ахада Аԥсны Афырхаҵа Галуст Трапизониан Аԥсны аерманцәа Реилазаара ахантәаҩы имаҵураҭыԥ аҿы ламысцқьала аус ауразы иҭабуп ҳәа иҳәеит.
Аҳәынҭқарра Ахада иааишьҭыз адныҳәаларатә шәҟәы аҿы аерманцәа Реилазаара Аԥсны аҿиара, уи аҳәынҭқарратә шьақәгылашьеи атәылауаҩратәии амилаҭбжьаратәии аҳәоуеиқәшәареи рырӷәӷәареи аҿы алагала ду алоуп ҳәа иазгәаҭоуп.
Аԥсны аерманцәа Реилазаара ахантәаҩы Галуст Трапизониан аиҿкаара аизара Дуқәа рыбжьара (2020 - 2022 шш.) аусуразы аҳасабырба ҟаиҵеит. Уи ҷыдала иазгәеиҭеит аиҿкаара аусура Аԥсуа ҳәынҭқарра арӷәӷәара ацхыраара аҭара раԥхьа иргыланы, есымша Аилазаара аԥҟаԥҵәа иарбоу ахыдҵақәа рынагӡара иазырхоуп ҳәа инаҵшьны иазгәеиҭеит. Уи еизаз иргәалаиршәеит аерманцәа реилазаара ахаҭарнакцәа 1992 – 1993 шш. Аԥсны аџьынџьтәылатәи еибашьра аан аԥсуа жәлар ирывагыланы ишеибашьуаз. Аӡәырҩы аҳәынҭқарратә орденқәеи амедалқәеи ранашьоуп.
Аизара аҿы иқәгылеит Гәылрыԥшь араион ахада инапынҵақәа назыгӡо Саид Ҳаразиа, Шәача ақалақь аделегациа ахантәаҩы, Урыстәыла аерманцәа Реилазаара ахантәаҩы Илларион Варваштиан, аџьынџьтәылатәи еибашьра аветеранцәа реиҿкаара «Аруаа» Ҭемыр Гәлиа.
Аизара рхы аладырхәит Аҳәынҭқарра Ахада Ихаҭыԥуаҩ Бадра Гәынба, Жәлар Реизара –Апарламент Аиҳабы Лаша Ашәба, ашәарҭадара Ахеилак Амаӡаныҟәгаҩ Серегеи Шамба, Аԥснытәи Аиашахаҵаратә Уахәама Ахада, аԥшьаҩеиҳабы Бассариан (Аԥлиаа).
Галуст Трапизаниан Аилазаара ахантәаҩы имаҵураҭыԥ ахь абизнесмен Алик Минасиан икандидатура адгалара мҩаԥигеит.
Аизара Ду аделегатцәа еицҿакны Аԥсны аерманцәа Реилазаара ахантәаҩыс далырхит Аԥсны жәлар Рџьынџьтәылатәи еибашьра аветеран, агәыҳалалратә фонд «Амшен» ахантәаҩы Алик Минасиан.
Афото Анаид Гогориан .
