Аҟәа. Жәабранмза 17, 2023 шықәса. Аԥсныпресс. Аҳәынҭқарра арратә шәарҭадара аиқәыршәара иадҳәалоу актуалра злоу апроблемақәа ирызкын жәабранмза 13 -17 рзы имҩаԥысуаз Аԥсны Арбџьармчқәа анапхгаратә еилазаара аоперативтә еизгара, ҳәа адырра ҟанаҵоит Аԥсны атәылахьчара Аминистрра апресс-маҵзура.
Аоперативтә еизгара ахь адыԥхьалара роуит Аԥсны атәылахьчареи Арбџьармчқәа рыштаб Хадеи аоперативтә еилазаара, амчратә структурақәа, ашәарҭадара Ахеилак ахаҭарнакцәа, иара убас атәылахьчареи амилаҭтә шәарҭадареи рзы апарламенттә Еилакы алахәылацәеи.
Арбџьармчқәа Рыштаб Хада аиҳабы, аинрал-леитенант Владимир Савченко ишазгәеиҭаз ала, «аизгара ахықәкы хаданы – анапхгаратә еилазаара, архәҭақәеи арратә ҟәшеиҵақәеи ркомандаҟаҵаҩцәа ҳаамҭазы имҩаԥысуа еиԥш ҳаԥхьаҟа иҟаларц зылшо бџьаршьҭыхлатәи аиҿагыларақәа рҿы арратә дҵқәа рынагӡаразы ирымоу азанааҭдырратә зыҟаҵара аҩаӡара ашьҭыхра».
