Аҟәа. Жәабранмза 14, 2023 шықәса. Аԥсныпресс. С. Ҷанба ихьӡ зху Аԥснытәи аҳәынҭқарратә драматә театр аҿы Фиодор Достоевски ироман «Бедные люди» амотивқәа рыла иҩу Валери Семеновски ипиеса ала иқәыргылоу аспектакль «Ловелас» аԥхьарбара мҩаԥысит. Аспектакль арежиссиори асахьаҭыхыҩи – Аԥсны зҽаԥсызтәыз акультура аусзуҩи Урыстәыла зҽаԥсазтәыз артист Адгәыр Ақаҩба.
Аспектакль аҿы ихәмаруеит Аԥсны зҽаԥсазтәыз артист Ҭеимураз Чамагәуа, Амра Наҷкебиа, Розита Ҭаниа, Леон Кур-оглы, Алиас Колбаиа.
Апиеса Макар Девушкини Варенька Добросиоловеи рыбзиабара аҭоурых иазкуп. Уи араҟа саламшәҟәыла иҟоу аклассикатә роман еиԥшны иҟам.
«Ахәаԥшыҩ дызтәызтәуа, иџьашьаху Достоевски, Гоголь, Пушкин рырҿиамҭақәа рколлаж, аҵакқәеи ахаҿқәеи рыхәмарра, ассоциациақәа рцәырҵра; аирониа зцу адунеихәаԥшышьатә хыцрақәа», - абри зегьы апиеса «Ловелас» ауп раԥхьаӡа иргыланы изызку.
