Аҟәа. Жәабранмза 14, 2023 шықәса. Аԥсныпресс. Аҳәынҭқарра Ахада иҟынтәи атәыла анапхгара ахь иаашьҭыз аусхкытәии хықәкылатәии адҵақәа рынагӡара иазкын иахьа аԥыза-министр Алеқсандр Анқәаб имҩаԥигаз аусуратә еилатәара. Аилатәара рхы аладырхәит аԥыза-министр актәи ихаҭыԥуаҩ Беслан Џьопуа, аԥыза-министр ихаҭыԥуаҩцәа Кристина Озган, Владимир Делба, Сергеи Пустовалов.
Аилатәара иалахәыз Аԥсны асоциал економикатә ҿиара ацхыраара иазку Аинвестициатә Программа аҳәаақәа ирҭагӡоу аусмҩаԥгатәқәеи абиуџьеттә усхкқәа рҿы аус зуа хазы игоу акатегориақәа ирыҵанакуа руалафахәы урыстәылатәи афинанстә цхыраара ала аицыфенанстәреи ирыдҳәалоу азҵаарақәа ирылацәажәеит.
Аԥыза-министр ихаҭыԥуаҩ, афинансқәа рминистр Владимир Делбеи аԥыза-министр ихаҭыԥуаҩ, аекономика аминистр Кристина Озгани иҟарҵаз адыррақәа рыла, аԥсуа ган 2022-2025 шш. Аԥсны асоциал-економикатә ҿиара ацхыраара аҭара азы Аҳәынҭқарратә Програмаа анагӡара азы анапхгарабжьаратәи аиқәшаҳаҭра иарбоу аҭагылазаашьақәа рынагӡара алнамыршар, усҟан аамҭала урыстәылатәи афинанстә цхыраара ахәҭак ала, мамзаргьы зынӡа иаанкылазар алшоит.
Иара убас, аилатәара аҿы алогистикатәии азакәанԥҵаратәии аспектқәа ҳасаб азуны Ҭырқәтәылеи Шьамтәылеи иҟалаз адгьылҵысра иахҟьаны ааха зауз аҳәынҭқарратә гуманитартә цхыраара рыҭара амеханизмқәеи ахыҵхырҭақәеи ашәагаақәеи ирылацәажәеит.
Аилатәара рхы аладырхәит Иҷыдоу аҭагылазаашьақәа рзы аминистр Лев Кәыҵниа, арепатриациа азы аҳәынҭқарратә Еилакы ахантәаҩы Вадим Ҳаразиа, абиуџьети афинансқәеи рзы апарламенттә еилакы ахантәаҩы Беслан Ҳалуашь.
Агуманитартә цхыраара аҳасабала аԥаратә хархәагақәа, хазхаҭалатәи ахаҿқәа рҟынтәи асадаҟы уахь иналаҵаны, реизгара ишацҵахо азгәаҭан. Аԥыза-министр арепатриациа азы аҳәынҭқарратә Еилакы ахантәаҩы агуманитартә цхыраара аноменклатура азы Шьамтәыла иҟоу Аԥсны Ацҳаражәҳәарҭеи Ҭырқәтәыла иҟоу аԥсуа культуратә центрқәа Рфедерациа анапхгареи рақәыршаҳаҭра азы анапынҵа ииҭеит.
