Аҟәа. Жәабранмза 8, 2022 шықәса. Аԥсныпресс. Иахьа имҩаԥысит Аԥсны Жәлар Реизара-Апарламент Аграртә политикеи, аԥсабаратә лшарақәеи, аекологиеи рзы аилак аилатәара. Ахантәаҩы Ҭемыр Беиа имҩаԥигаз Аилак иалахәын Апарламент адепутатцәа, Апарламент аҟны иҟоу Аԥсны Ахада ихаҭарнак, аиустициа аминистр Анри Барцыц.
Амш азҵаара инақәыршәаны иахәаԥшын «Аԥсны Аҳәынҭқарра ақыҭанхамҩазы» Аԥсны Аҳәынҭқарра Азакәан апроект. Ари азакәан адкылара алшарақәа аԥнаҵоит ақыҭанхамҩатә усхк, ақыҭанхамҩатә аалыҵ аџьармыкьа, аӡеи афатә аалыҵи рҳәаақәҵаразы апринцип хадақәа рзы, ақыҭанхамҩатә аалыҵ аарыхра амаҵ аура аусхкгьы налаҵаны.
Аусураан Аилак алахәцәа азыӡба рыдыркылеит Аҳәынҭқарратә программала ақыҭанхамҩа аусхк ашықәсазтәи Ареспубликатә биуџьет аҟнытә 5% иреиҵамкәа иартәозароуп ҳәа финансла аиқәыршәара амҽхак апрограмма анагӡара анымҩаԥысуа аамҭа зегьы, УА аҟнытә иааиуа афинанстә цхыраагӡақәа аламҵакәа, иагьадгылеит азакәанапроект иақәнагоу арҽеирақәа ралагалара.
Иара убас адепутатцәа «ақыҭанхамҩа аусхк аҟны аиҭаусадулара аҿиареиԥш» иҟоу ахырхарҭа аҳәынҭқарратә дгылара иадҳәалоу аҟәша харҭәаатәуп ҳәа ирыԥхьаӡоит.
Анаҩс адепутатцәа ахәаԥшит «Агеодезиатәи ахсаалаҩыратәи усуреи анаӡааӡаратә рбагақәеи рзы» азакәан апроект, агеодезиатәии ахсаалаҩыратәии усураҟны аизыҟазаашьақәа ҳәаақәызҵо, анаӡааӡаратә рбагақәа рыԥшаара, реизгара, рыҵәахра, аус рыдулара, рыларҵәара уахь иналаҵаны, иара убас аинформациатә системақәа рхархәаралагьы.
Аилацәажәара аихшьалақәа рыла иӡбан Апарламент ааигәа имҩаԥысраны иҟоу асессиа аилатәараҟны аҩбатәи аԥхьараан изхәаԥшыз азакәанапроектқәа рышьақәырӷәӷәара абжьгара.
Аграртә политикеи, аҧсабаратә лшарақәеи, аекологиеи рзы аилак алахәцәа алацәажәеит адгьылтә ҭыԥқәа рхархәара иадҳәалоу азҵаарақәа жәпакы, урҭ Апарламент асессиа аилатәарахь ахәаԥшразы инагатәуп ҳәагьы рыӡбеит.
