Сухум. 13 февраля 2023. Апсныпресс.  Апарламент аҟны имҩаԥысит Аԥсны Жәлар Реизара – Апарламент Аекономикатә политикеи, ареформақәеи, аинформациатә технологиқәеи рзы аилак аилатәара.

Аилак алахәцәа алацәажәеит «Аԥсны Аҳәынҭқарра Ақалақьргыларатә закәанеидкыла аусура аларгаразы» азакәан апроект. Иӡбан ари азакәанапроект Аԥсны Жәлар Реизара – Апарламент изаамҭанытәиу асессиа аилатәара амш азҵаара алаҵара.   

Аилатәараҟны иахәаԥшын иара убас «Ареспубликатәи амуниципалтәи хатәтәра априватизациа азуразы» Аԥсны Аҳәынҭқарра азакәан аԥсахрақәа ралагаларазы» Азакәан апроект.

Азакәанапроект авторцәа аус зуа азакәан иалгатәуп ҳәа азырыԥхьаӡеит Аԥсны Аҳәынҭқарра Аминистрцәа Реилазаара иазнархиаз ареспубликатәи амуниципалтәи хатәтәра аобиектқәа реиқәыԥхьаӡа.

Азакәан апроект азы аилыркаагатә шәҟәыбӷьыц аҟны иҳәоуп: «Ари аԥҟара иара убас аҭыԥантәи ахаланапхгара аусбарҭақәагьы аҵанакуеит, ҷыдала, ас еиԥш иҟоу азнеишьақәа азԥхьагәазҭо анорма аныхтәуп ҳәа иҳаԥхьаӡоит аҭыԥантәи ахаланапхгара аусбарҭақәа рганахьалагьы.

Убри аан, Аилак алахәцәа апроект ала Аминистрцәа Реилазаара азинмчқәа харҭәаатәуп ҳәа ирыԥхьаӡоит, априватизациа ззухо ареспубликатәи амуниципалтәи хатәтәра ахә ақәҵаразы аԥҟарақәеи аметодқәеи Аминистрцәа Реилазаара иазнархиоит, Жәлар Реизарахь ашьақәырӷәӷәаразы иагьнанагоит ҳәа азгәаҭаны.

Ари аҿыцра хықәкы хаданы иамоуп априватизациатә процесс еиҳа лыҵшәа аманы амҩаԥгара, избан акәзар ари арҽеира адкыларала Апарламент априватизациа апроцесс анырра аҭаразы алшара аиуеит».