Егьырҭ атәылақәа ирҿырԥшны Аԥсны атуризм аҿиара амҩаԥысшьа далацәажәо, аминистр иазгәеиҭеит:
«Сара исҭахуп шәара аганахьала, Аԥсны атәылауаа раҳасабала акәымкәа уи асасцәа реиԥш иарбоу азҵаара шәахәаԥшырц. Шәача ақалақь аҿы XXII Аолимпиатә хәмаррақәа рымҩаԥгара ашьҭахь – ари зынӡа даҽа қалақьны иҟалеит, уи иахьа апарт-отельқәа рыргылара абзоуралагьы адунеизегь еицырдыруа акурорт ауп. Шәача ақалақь акурортә обиектқәа алшықәсанык атуристцәа рҭаауеит. Қырҭтәыла иаҿырԥшны ҳахәаԥшуазар, иахьа Қарҭ ақалақь Европа иреиӷьу ақалақьқәа иаҿдырԥшуеит. Қырҭтәыла атуристтә центрны иҟоу ақалақь Баҭым Палермо иаҿдырԥшуеит, уи аԥшьараамҭа ахгаразы иреиӷьу ақалақьқәа ирхыԥхьаӡалоуп».
Аминистр иажәақәа рыла, еиуеиԥшым амзызқәа ирыхҟьаны, аобиективтә мзызқәагьы уахь иналаҵаны, ҳара ҳааигәа-сигәа иҟоу атәылақәа раасҭа аиҵахара ҳамоуп.
«Жәаҳәарада, ҳара зеиӷьаҟам аԥсабаратә ҭагылазаашьақәа ҳамоуп. Ҳара ҳасасдкылара аӡәырҩы ахнахуеит, аха агьырҭ ахырхарҭақәа рыла аиҵахара ҳамоуп, убри аҟнытә ԥхьаҟа ҳазгаша ашьаҵа аҟаҵара хымԥадатәиуп, апарт-отельқәа рзы азакәан адкыларалагьы уахь иналаҵаны», - ҳәа иажәахә хыркәшо иҳәеит атуризм аминистр Ҭеимураз Хишба.
