Аҟәа. Жәабранмза 10, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны иҟоу Урыстәылатәи Афедерациа Аҷыдалкаатә зинмчы змоу Ацҳаражәҳәаҩ Михаил Шургалин Адипломатиатә усзуҩы имш идиныҳәалеит.
Аслан Бжьаниа ахә ҳаракны ишьеит Урыстәыла Аҷыдалкаатә зинмчы змоу Ацҳаражәҳәаҩ Михаил Шургалин Аԥсны Аҳәынҭқарреи Урыстәылатәи Афедерациеи реидгыларатә еизыҟазаашьақәа рырӷәӷәараҟны илагаламҭа.
Адныҳәалараҟны иҳәоуп:
«Ҳаҭыр зқәу Михаил Александр-иԥа! Азин сышәҭозар, Шәаргьы Аԥсны Аҳәынҭқарраҟны иҟоу Урыстәылатәи Афедерациа Аҷыдалкаатә зинмчы змоу Ацҳаражәҳәарҭа аусуҩцәагьы ишәыдысныҳәаларц сҭахуп шәзанааҭтә ныҳәа – Адипломатиатә усзуҩы имш.
Аԥсны Аҳәынҭқарраҟны иҟоу Урыстәылатәи Афедерациа Ацҳаражәҳәарҭа Шәара шәнапхгарала аус ауеит урыстәылатәи адипломатиа иреиӷьу атрадициақәа инарықәыршәаны. Шәара шәыпрофессионализм, шәыпринципра, аус шәазыҟазаашьа аԥсны-урыстәылатәи аиҩызаратә еидгыларатә еизыҟазаашьақәа рырӷәӷәара иацхараауеит.
Акрызҵазкуа абри амш аҽны ишәзеиӷьасшьар сҭахуп Шәаргьы Аԥсны Аҳәынҭқарраҟны иҟоу Урыстәылатәи Афедерациа Ацҳаражәҳәарҭа аусуҩцәагьы агәабзиара, ахирра, адипломатиатә усураҟны аҭынчреи аихьӡарақәеи!»
