Аҟәа. Жәабранмза 8, 2023 шықәса. Аԥсныпресс. Имҩаԥысит Аҳәынҭқарра Ахада Аслан Бжьаниа инапынҵа ала иаԥҵаз, изакәанымкәа акриптовалиута арҳара аҿагылара иазку Ареспубликатә штаб аилатәара, ҳәа адырра ҟанаҵоит аминистрцәа Реилазаара асаит.
Атәыла аԥыза-министр Алеқсандр Анқәаб ихантәаҩрала иаԥҵоу аштаб аилазаара иалалеит аекономика Аминистрра анапхгараҭара, Аҳәынҭқарратә шәарҭадара Амаҵзура, аҩныҵҟатәи аусқәа Рминистрра, Аҳәынҭқарратә ҳазылхратә Еилакы, Ареспубликатә унитартә Наплакы «Амшынеиқәафымцамчи» уи ареигионалтә ҟәшеиҵақәеи рхаҭарнакцәа.
Аԥыза-министр аштаб алахәылацәа изакәанымкәа акриптовалиута арҳареи уи азы иҷыдоу аиқәыршәагақәа Аԥсныҟа раагара аԥхьырҟәҟәаареи рҿагылара азы Аҳәынҭқарра Ахада иҟаиҵаз анапынҵақәа ртәы рзеиҭеиҳәеит.
Афымцаенергетикатә усхкы аҿы аҭагылазаашьа акыр иуадаҩуп, убри аҟнытә амаининг аҿагылареи егьырҭ ауснагӡатәқәеи аенергетикатә инфраструктура иамоу ақәыӷәӷәара акыр иланарҟәыроуп, - ҳәа инаҵшьны иазгәеиҭеит Алеқсандр Анқәаб. Уи ишьақәгылаз аҭагылазаашьеи уи аиҭакреи рзы зегьы раԥхьаӡа иргыланы аҭакԥхықәра зду афымцаенергетикатә наплакқәа рнапхгаҩцәа роуп ҳәа иазгәеиҭеит.
Ахәҭакахьала, аԥыза-министр игәаангарала, амаининг аппаратқәа афымцацәаҳәақәа изакәанымкәа раҿакреи атрансформатортә станцеиҵақәа зинда рышьақәыргылареи рхархәареи ирыдҳәалоу афактқәа излауа ала рырмаҷра алыршатәуп. Ари аусура Аҳәынҭқарратә шәарҭадара Амаҵзуреи аҩныҵҟатәи аусқәа Рминистрреи русеицурала инагӡахоит.
Аҳәынҭқарратә ҳазылхратә Еилакы Аԥсныҟа акриптовалиута арҳара иазку аппаратқәа раагара аԥхьырҟәҟәара иазку аоперативтә усура арӷәӷәара азы азԥхьанҵа аҭоуп.
Ареспубликатә Унитвртә Наплакы «Амшынеиқәафымцамч» аҿгақәа рнапхгаҩцәа хара имгакәа ауаа реиланхарҭақәа рҿы изакәанымкәа афымцатрансфарматорқәа раҿакреи атуристтә усхкы аобиектқәа рҿы акритовалита арҳара иазку аппаратқәа рышьақәыргылареи рганахьала агәаҭарақәа рымҩаԥгара азы адҵа рыҭоуп.
