Асеминар аҩбатәи ахәҭа апрактикатә хыдҵақәа рыла ишьақәгылан, астатиақәа ахы, алид аҟаҵареи, нас урҭ атекст аҿы инарыгӡо ароли иазааҭгылеит. Иара убас, «иаарҳәу аперамида» ҳәа изышьҭоу асхема  ала ажәабжь ҿыцқәа рыҩра априомқәа дырбан.

«Сара сгәаанагарала, ас еиԥш асеминарқәа апресс-маҵзурақәа рзы еиԥш амассатә информациа ахархәагақәа рхаҭарнакцәагьы рзы рымҩаԥагара акыр хра злоу усуп. Ҳара еиҳа инарбаау аудиториа адыԥхьалара азы – онлаин-формат ала уахь иналаҵаны, аҽазыҟаҵаратә усмҩаԥгатәқәа аринахысгьы рымҩаԥгара ҳгәы иҭоуп», - ҳәа инаҵшьны иазгәеиҭеит  Иури Радионов.

Асеминар аусура аҩбатәи амш аԥшьаша, жәабранмза 9 рзы имҩаԥгахоит. Уи Аԥснытәи ажурналистцәа ареспубликатә масштаб змоу амилаҭтә проектқәа рылахәхареи амассатә аудиториеи ацифратә форматқәеи рзы аекономикатә жәабжьқәа раԥҵара апроблемақәеи ирызкхоит.