Аҟәа. Жәабранмза 7, 2022 шықәса. Аԥсныпресс. Аԥыза-министр Алеқсандр Анқаб аԥыза-министр ихаҭыԥуаҩ, афинансқәа рминистр Владимир Делба, агәабзиарахьчара аминистр Едуард Быҭәба, Ареспубликатә Унитартә Наплакы «Аԥсныфармациа» адиректор Русҭам Адлеиба алархәны агәабзиарахьчара аусхкы аҿы аусмҩаԥгатәқәеи апрограммақәеи рфинанстәра азҵаарақәа ирызкын аилатәара мҩаԥигеит.
Владимир Делба иҟаиҵаз адыррақәа рыла, агәабзиарахьчара Аминистрра Ареспубликатә Унитартә Наплакы «Аԥсныфармациа» аҿаԥхьа амедицинатә усбарҭақәа рҭаххрақәа рхарҭәаара азы ахәшәқәа раахәара азы иақәу ауал 30 млн. мааҭ рҟынӡа инаӡоит. Ажьырныҳәамза, 2023 шықәса рзы 21 млн. мааҭ рҟынӡа ауал ашәара алыршахеит.
Атәыла анапхгара ахада агәабзиарахьчара Аминистрреи афинансқәа Рминистрреи иаанхаз ауал ашәара аграфик еиқәдыршәарц азы адҵа ҟаиҵеит. Владимир Делба иара убас Урыстәылатәи Афедерациа ахәышәтәырҭақәа рҿаԥхьа иҟаз ауал ашәара шалыршахаз азы адырра ҟаиҵеит. Ажьырныҳәамзазы иарбоу ахықәкқәа рзы идәықәҵахеит 33 млн. мааҭ.
Иара убас Ареспубликатә онкологиатә центр аусура иадҳәалоу азҵаарақәагьы ирылацәажәеит. Алеқсандр Анқәаб апрофилтә хылаԥшырҭақәа рнапхгаҩцәа Ацентр апациентцәа ахимиотерапиа азы амаҭәашьарқәа рыла реиқәыршәара иазку азеиԥш усура акоординациа аҭара азы адҵа риҭеит.
