Аҟәа. Жәабранмза 7, 2023 шықәса. Аԥсныпресс. Акультура аминистр Даур Ақаҩба жәларбжьаратәи аконкурсқәа рлауреат, хыԥхьаӡара рацәала аџьазтә фестиваль дуқәа иралахәхахьаз, Москватәи аҳәынҭқарратә акультура Аинститут аестрада-џьазтә шәаҳәара акафедра аиҳабы лхаҭыԥуаҩ Лаура Водианицкаиа дидикылеит.
Аԥсны акультура Аминистрра апресс-маҵзура иҟанаҵо адыррақәа рыла, аиԥылара аҿы аҵарадырра, ахәҭакахьала амузыкатә ҟазара аганахьала акадрқәа разыҟаҵара иадҳәалоу азҵаарақәа жәпакы ирылацәажәеит.
Аҩаша, жәабранмза 7, асааҭ 12:00 рзы, амузыкантцәа Лаура Водианицкаеи Антон Давидианци Самсон Ҷанба ихьӡ зху Аԥснытәи аҳәынҭқарратә драматә театр аконцерттә зал аҿы амасстер-класс мҩаԥыргоит.
Антон Давидианц – Урыстәылатәи Афедерациа аҿы иреиӷьу абасистцәа дреиуоуп. Аџьазтә музыкантцәа Игор Бутман, Даниил Крамер, Сергеи Манукиан, Алексеи Козлов, иара убас артистцәа Леонид Агутин, Николаи Носков, «Би-2», «Елка» аус рыциухьеит.
