Аԥсны ауаатәыҩса зегьы ирныруа азҵаара иаҵоу ҷыдала ихадоу аҵакы ҳасаб азуны изакәанымкәа акриптоваоиута арҳара аҿагылара азы араионтә штабқәа русура арӷәӷәареи атәыла аԥыза-министр Алеқсандр Анқәаб ихантәаҩрала Ареспубликатә штаб Хада аԥҵареи рзы аӡбамҭа рыдыркылеит.
Аҳәынҭқарра Ахада Ихаҭыԥуаҩ Бадра Гәынба Ареспубликатә Унитартә Наплакы «Амшынеиқәафымцамч» адиректор хада инапынҵақәа нызыгӡо Рамин Зингишвилии Аԥсны Аҳәынҭстандарт ахантәаҩы Нарсоу Сангәлиеи атәыла аҩныҵҟатәи аусқәа Рминистрреи Аҳәынҭқарратә шәарҭадара Амаҵзуреи русзуҩцәа алархәны араионқәа зегьы рҿы изакәанымкәа акриптовалиута арҳара иазку аппаратқәеи урҭ рымчхара аизырҳара иазку атрансформаторқәеи афымцамҩангагатә цәаҳақәа раҿакра аԥхьырҟәҟәаара азы агәаҭарақәа мҩаԥыргарц азы анапынҵақәа риҭеит.
Ареспубликатә Унитартә Наплакы «Амшынеиқәафымцамч» иара убас Аԥсны араионқәа зегьы рыҟны афымцамч ахархәара адинамикеи аҟазшьарбақәеи, иара убас ахархәаҩцәа афымцамч ала реиқәыршәара аамҭала иалагалоу аԥкрақәеи рзы есыҽны ауааԥсыра адырра рыҭаразы азԥхьанҵа ҟаҵоуп.
Аҩныҵҟатәи аусқәа Рминистрреи Аҳәынҭқарратә шәарҭадара Амаҵзуреи изакәанымкәа иаҿаку аиқәыршәагақәа раҿыхреи рықәгареи рзы адҵа рыҭоуп. Ирымхыз аиқәыршәагақәа зегьы Аҳәынҭқарратә ҳазылхратә Еилакы аҿы агәаҭара ашьҭахь, иара убас иарбоу аиқәыршәагақәа раагара азы аинформациа аҟамзараан, аконфискациа мҩаԥгахоит.
Иара убас азинхьчаратә усбарҭақәа зегьы иарбоу аппаратқәа Аԥсныҟа раагара аԥхьырҟәҟәаара хықәкыс иҟаҵаны, акриптовалиута арҳара иазку аппаратқәа рсервистә маҵзуреи раагареи иазкны, асоциалтә каҭақәеи рыла алаҳәарақәа рыҟаҵарала уахь иналаҵаны, аус зуа аиҿкаарақәа зегьы ргәаҭара амҩаԥгара азы адҵа ҟаҵоуп.
Аилатәара рхы аладырхәит Аҳәынҭқарра Ахада Иусбарҭа анапхгаҩы Џьансыхә Нанба, атәыла аԥыза-министр Алеқсандр Анқәаб, аԥыза-министр ихаҭыԥуҩ, аекономика аминистр Кристина Озган, аҩныҵҟатәи аусқәа рминистр Вальтер Быҭәба, Аҳәынҭқарратә шәарҭадара Амаҵзура ахантәаҩы Роберт Киут, апрокурор Хада Адгәыр Агрба, астандартқәеи ахархәаратәии атехникатәии ахылаԥшра азы аҳәынҭқарратә Еилакы ахантәаҩы Нарсоу Сангәлиа, Ареспубликатә Унитартә Наплакы «Амшынеиқәафымцымч» адиректор Хада инапынҵақәа назыгӡо Рамин Зингишвили, атәыла аԥыза-министр ицхырааҩ Дмитри Шамба.
