Аҟәа. Ԥхынҷкәынмза 26, 2022 шықәса. Аԥсныпресс. Аԥсны Жәлар Реизара – Апарламент Аиҳабы Лаша Ашәба Аԥсны Аҳәынҭқарра Аԥыза-министр Александр Анқәаб Ииубилеи идиныҳәалеит.
Адныҳәалараҟны иҳәоуп:
«Ҳаҭыр зқәу Александр Золотинск-иԥа!
Гәык-ԥсык ала ишәыдысныҳәалоит 70 шықәса шәхыҵра аиубилеи.
Шәара шәызнысыз аџьатә мҩа Аԥсадгьыл амаҵзура иазкуп. Ишәҟазшьоу агәамчи аиҿкааратә ҟыбаҩи есқьынгьы қәнагала ахархәара рыман. Шәнапы злакыз иарбанзаалак аус ҳреспублика аҿиара ацхраара иазкын. Амаҵзура ҳаракқәа рыҟны шәыҟазаараан Шәара есқьынгьы абаҩхатәра змоу анапхгаҩы иаша иҟазшьақәа шәрықәныҟәон.
1991 шықәсазы адепутат иаҳасабала Аԥсны Аҳәынҭқарра Иреиҳаӡоу Асовет – Аԥсны Жәлар Реизара – Апарламент I ааԥхьарахьы, 2017 шықәсазы Апарламент VI ааԥхьарахь шәаналхыз аахыс Шәара Аԥсны Аҳәынҭқарра азакәанԥҵара аҿиараҟны шәлагаламҭа дууп.
Иахьа Аԥсны Аҳәынҭқарра Аиҳабыра напхгара азуа, гәыцԥыҳәарала Аԥсны жәлар реизҳазыӷьара ахьӡала аусура мҩаԥыжәгоит.
Хықәкыла ауаа рлахьынҵа, акультура, аспорт иашәҭо азҿлымҳара ауаажәларра рыҩныҵҟа аҳаҭырқәҵара шәаԥсаны шәҟарҵеит.
Агәра згоит Аԥсны жәлар рыхьӡала имҩаԥыжәго аусқәа аԥхьаҟагьы ишрыцҵахо, егьырҭ анапхгаҩцәа рызгьы иҿырԥшыганы ишыҟало.
Александр Золотинск-иԥа, гәык-ԥсык ала ишәзеиӷьасшьоит агәабзиара, ахирра, аихьӡарақәа».
