Аҟәа. Ԥхынҷкәынмза 17, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа иҟаиҵаз адҵала Аԥснынтәи Донбассҟа идәықәҵоуп изаамҭанытәиу агуманитартә цхыраара.
Уажәы 100 тоннак амандарин ала рыла ишьақәгылоу аидара Аԥсны жәлар рыхьӡала Ашықәс ҿыц азы Херсонсктәи, Донецктәи, Лугансктәи, Запорожсктәи аобласт аҟны инхо ахәыҷқәа ирызкуп.
Уи аԥхьа Аҟәа Ахақәиҭра ашҭаҿы Иҷыдоу аҭагылазаашьақәа рзы Аминистрра агуманитартә колонна дәықәҵан. Актәи апартиа Донбасс инеиуеит ԥхынҷкәынмза 19 рзы.
Урыстәыла акциа рҽаԥыршьраны иҟоуп Херсонск, Донецк, Луганск, Запорожсктәи аобласт аҟны аволонтиортә центрқәа аартны измоу урыстәылазегьтәи ауаажәларратә еиҿкаара «Молодаиа гвардиа» аволонтиорцәа.
Аԥснынтәи ареспубликақәа зегьы рахь идәықәҵоу агуманитартә еидара хаҭала дацзаауеит аҷыдалкаатә ҭагылазаашьақәа рзы аминистр Лев Кәыҵниа.
Ишәгәалаҳаршәоит, Аԥсны Ахада Аслан Бжьаниа иҟаиҵаз адҵала ареспублика араионқәа зегьы рыҟны ԥхынҷкәынмза 5 инаркны ишаартыз агуманитартә цхыраара аизгаразы апунктқәа.
Ареспубликаҟны ауааԥсыра гәацԥыҳәарала Донбасс инхо ахәыҷқәа рзы еиҿкааз акциа рҽаладырхәны амандарин рзеизыргеит.
