Аҟәа. Ԥхынҷкәынмза 17, 2022 шықәса. Аԥсныпресс. Гал ақалақь акультура Аҩны аҟны иҟоу ахореографиатә ахәыҷтәы ансамбль «Самырзаҟан» Москва ақалақь аҿы имҩаԥысуаз жәларбжьаратәи ахореографиатә фестиваль-конкурс «Диагональ» аҿы гран-при анашьахеит. Абри азы адырра ҟаҵоуп асоциалтә каҭақәа рҿы иҟоу ансамбль адаҟьа аҟны.
Ансамбль «Самырзаҟан» инанагӡеит «Аланаа рыкәашара», «Ашьхарыуаа рыкәашара», иара убас «Аԥсуа ныҳәатә кәашара».
Ансамбль асахьаркыратә напхгаҩы – Беслан Кобалиа. Ахореографцәа – Паата Хубулаа, Каха Цкәитариа, Зука Џьынџьолиа, Викториа Баркаиа.
Иара убас ахореографиатә ансамбль «Самырзаҟан» ақалақь Санкт-Петербург имҩаԥысыз афестиваль-конкурс аҿы ианашьахеит афестиваль иреиҳаӡоу аҳамҭа - Гран-при.
Галтәи ахәыҷтәы ансамбль лаҵарамза, 2023 шықәсазы Чечентәылатәи Ареспублика имҩаԥысраны иҟоу афестиваль ахь ааԥхьара аиуит.
