Аиԥш зеиԥшыз ацәгьоура ҳҭоурых иаздырӡом. Иҭахаз реиҳараҩык ахеиқәырхаразы, аӷа дзыкәшаны иҟаз Ҭҟәарчал иалҵырц иаҿыз аҭынч уааԥсыра роуп. Урҭ рыҩныҵҟа иҟан ахшара зцәа иалаз ааҩык аҳәсеи 35-ҩык ахәыҷқәеи. Ԥхынҷкәынмза 14 Аԥсны аҭоурых ианылеит хара здымыз ауаа ршьала икәабоу, 1992-1993 шш. Аԥсны Аџьынџьтәылатәи еибашьраҟны иҭахаз ахәыҷқәа зегьы ргәалашәара иамшны. Лаҭатәи атрагедиа иалаӡыз ауаа рыхьыӡқәа наунагӡа хашҭра рықәымкәа ианызаауеит иҭахаз рыхьӡала иргылоу абаӡа.
Ари арыцҳареиԥш, ақырҭуа архәҭақәа ҳажәлар зҭадыргылаз агәаҟра ахаангьы ҳгәы иҭынҵәараны иҟам. Иаҳхашҭрангьы ҳаҟаӡам арҭ агыгшәыграқәа, уи мҩаԥызгозгьы аҭакԥхықәра рыдҵазароуп!
Аибашьра иаҳзаанагаз агәаҟрақәа ареспублика иқәынхо ауааԥсыра зегьы еиҳагьы еиднакылеит аӷа иҿагыланы ақәԥараҟны. Аԥсуа жәлар риашареи аиааиразы ирымаз агәрагареи Аԥсны ахьчаҩцәа аҳәынҭқарра ахьыԥшымразы ирымаз ахықәкы анагӡараҟны ирыцхрааит.
Иахьа имҩаԥысуа аглобалтә процессқәа иҳарҳәоит 1992-1993 шш. Аԥсны Аџьынџьтәылатә еибашьра иадҳәалоу ахҭысқәа рхамышҭра, ҳҭоурых мырӡкәа абиԥара ҿыцқәа рызнагара иамоу аҵакы ахадара атәы.
Хашҭшьа рымаӡам Лаҭатәи атрагедиаҟны иҭахаз зегьы. Имариам ари ахьаа хызҽыша ажәақәа рыԥшаара. Рхьаа рыцеиҩаҳшоит урҭ рыуацәеи рҭынхацәеи.
Аԥсны жәлар зегьы аринахыс ирзеиӷьаҳшьоит аҭынчра, ахирра!
