Аҟәа. Ԥхынҷкәынмза 7, 2022 шықәса. Аԥсныпресс. Ԥхынҷкәынмза 7 рзы Аҟәа ақалақь аҿы иаадыртит Аԥсни Урыстәылеи аполитикатәии ауаажәларратә усзуҩ, азиндырратә наукақәа ракандидат Тарас Шамба ибаҟа.
Абаҟа аартра ацеремониа рхы аладырхәит Аҳәынҭқарра Ахада Аслан Бжьаниа, Аҳәынҭқарра Ахада Ихаҭыԥуаҩ Бадра Гәынба, Жәлар Реизара-Апарламент Аиҳабы Лаша Ашәба, Адунеизегьтәи Аԥсуа-база жәлар Рконгресс ахантәаҩы Мусса Еқьзеқь, адепутатцәа, аминистрцәа, Тарас Мирон-иԥа Шамба иуацәа, иҩызцәа.
Бадра Гәынба, абаҟа аартра ацеремониа аҿы дықәгыло, Тарас Шамба иналукааша аԥснытәии урыстәылатәии аполитикатә усзуҩны дыҟан ҳәа иазгәеиҭеит.
«Кавказ ажәларқәа реилибакаара, Урыстәылеи Кавказ ажәларқәеи реимабзиаратә еизыҟазаашьақәа рыҿира иадҳәалоу аусура иара илагала ду алоуп. Алада Урыстәыла ауаажәларратә еиҿкаарақәа жәпакы рхадацәа иара Кавказ ажәларқәа Урыстәылатәи Рконгресс ацхантәаҩыс далырхит. Тарас Шамба иабжьгарақәа акыр иуадаҩу, аимак-аиҿак зцу аполитикатә дискуссиақәа рҭышәныртәалара иацхраауан», – ҳәа инаҵшьны иазгәеиҭеит иара.
Адунеизегьтәи аԥсуа-база жәлар Рконгресс Иреиҳаӡоу Ахеилак ахантәаҩы Мусса Екзеков игәаанагарала, Тарас Шамба иԥсҭазаара зегьы зызкыз – Иԥсадгьыли иуаажәлари Реизҳазыӷьара иазкны ус аура акәын.
«Иара абаза жәларқәа реидкылара аус илагала ду алоуп. 25 шықәса ирылагӡаны уи Адунеизегьтәи аԥсуа-база жәлар Рконгресс напхгара аиҭон, иџьынџьуаа рыԥсҭазаара аиӷьтәра азы илшо зегьы ҟаиҵон. Тарас Шамба даара згәы ҭбааз уаҩын, уи иҟәышреи илаз ахарахәыцреи ирыбзоураны акыр иуадаҩыз азҵаарақәа рыӡбара алыршахон», - ҳәа иҳәеит иара.
Аԥсны ашәарҭадара Ахеилак Амаӡаныҟәгаҩ, Тарас Шамба иашьа гәакьа Сергеи Шамба иажәақәа рыла, Тарас Мирон-иԥа иԥсҭазаара зегьы ижәлар гәакьа иазикит.
«Ус ауп ҳара ҳҭаацәа ҳшырааӡаз. Тарас Шамба данқәыԥшӡаз инаркны, М. Ломоносов ихьӡ зху Москватәи аҳәынҭқарратә Университет азиндырратә факультет данҭала, сашьа еиҳабы Москватәи аԥсуа диаспора аԥиҵеит, анаҩс акыр шықәса ирылагӡаны уи напхгарагьы аиҭон. Уи иԥсадгьыли иуаажәлари рзы илшоз зегьы ҟаиҵон», - ҳәа инаҵшьны иазгәеиҭеит Сергеи Шамба.
Абаҟа автор - Аҟәатәи аскульптор Аврора Иулина.
Тарас Шамба жьҭаарамза 13, 2020 шықәса рзы, 83 шықәса дшырҭагылаз ихьыз акоронавирустә ҿкы чымазара иахҟьаны иԥсҭазаара далҵит. Иԥсҭазаара иалагӡаны уи Аԥсны анаукатә, акультуратә, аполитикатә ҿиара илагала ду алеиҵеит. Иара дравторуп азакәанреи аҳәынҭқаррареи адемократиеи рыпроблемақәа ирызку 300 инарзынаԥшуа анаукатә усумҭақәа. Асовет Еидгыла адепутат, Адунеизегьтәи аԥсуа-база жәлар Рконгресс апрезидент, «аԥсуа ҳәынҭқарра ашьақәгылареи Кавказ ажәларқәа рыбжьара аимадара арӷәӷәареи рҿы илагала дууи шықәсырацәа инеиԥынкыланы хра злоу аусуреи рзы» «Ахьӡ-Аԥша» аорден I аҩаӡара ианашьоуп.
