Ҳажәларқәа рдоуҳа, рҭоурых, рбызшәа ракра - шықәсырацәалатәи аиҿцаара, аидгылара иалҵшәаны иҟалеит. Имыцхәхаӡом, милаҭк аҳасабала ҳаиқәхарагьы ишиашоу абри апроцесс иадҳәалоуп ҳҳәар.

Адунеизегьтәи аԥсуа-абаза конгресс аусура анхацыркыз аахыс имҩаԥгоу аусураҟны иҟоу алҵшәақәа алыршоуп, хымԥада, аиҳабацәа рабиԥара иабзоураны. Ахә ашьара уадаҩуп абри аус аиҿкаареи анапхгареи рҿы зылшамҭақәа рацәоу: Тарас Шамба, Иура Аргәын, Геннади Аламиа, Денис Чачхалиа, Арӡынба Џьамалиҭҭин, Бедиз Кәарцхьиапха, Елҳан Кәаӡба, Сергеи Пазов, Мусса Екзакь уҳәа уб.егь. имҩаԥыргаз аус.

Ҳхырхәоит Адунеизегьтәи аԥсуа –абаза аԥҵареи ашьақәгылареи рыҟны злагаламҭа аҵак ду амоу иахьа ара иҳалалагылам, здунеи зыԥсахыз ргәалашәара аҿаԥхьа.

Агәахәара унаҭоит иахьа урҭ рыԥсҭазааратә ԥышәа, аԥсадгьыл ахь ирымоу абзиабара, ҳҵасқәа, ҳажәлар рдоуҳатә ҭынха ҿыц игылаз абиԥарақәа иахьрымардо.

Иахьа урҭ Мусса Екзакь инапхгарала  абызшәеи акультуреи рыҿиаразы акрызҵазкуа аусқәа мҩаԥыргоит.  Аконгресс аҿаԥхьа иқәнаргылаз ауснагӡатәқәа хадақәа иреиуоуп  ҳдиаспора ахаҭарнакцәа рҭоурыхтә ԥсадгьыл ахь рыхынҳәра, ҳџьынџьуаа Аԥсны аекономикатә, асоциалтә, акультуратә ҿиара ралархәра, аԥсуа-абаза жәлар рмилаҭтә хаҿра аиқәырхара . Сара агәра згоит абарҭ ахырхарҭақәа рыҟны аихьӡарақәа раарԥшра шрылшо.

Аконгресс еиднакыло аԥсуа-абаза аҭаацәара ду иазеиӷьасшьоит ақәҿиарақәа. Изну амҩа еицакра ақәымзааит!»