Аминистр ихаҭыԥуаҩ Саида Делба аспециалистцәа разымхара апроблемагьы ықәгылоуп ҳәа иазгәалҭеит. «Аиҳарак ари адифицит ҳара иаҳныруеит Ареспубликатә хәыҷтәы хәышәтәырҭа аҿы, ҳара ари аҭагылазаашьа алҵра алҳаршароуп хымԥада», - ҳәа инаҵшьны иазгәалҭеит лара.
Аштатнҭыҵтәи апедиатр хада Ангелина Оҭырба лажәақәа рыла, зынӡа ареспублика аҿы аус руеит 33 педиатр, аха уеизгьы уи азхо иҟам.
Аминистр ирҭаз адыррақәа рыла апедиатрцәа рзанааҭтә дырра аҩаӡара ашьҭыхра азы аусурақәа аанкылаӡам. Аамҭа кьаҿ иалагӡаны аҳақьымцәеи амедиаҳәшьцәеи Манту, Диаскин-тест, БЦЖ амҩаԥгара азы акурсқәа, иара убас атуберкулиоз иаартым аформақәа заанаҵтәи раарԥшра азы асертификациатә курсқәа иахысраны иҟоуп.
Ирылацәажәеит иара убас амедусбарҭақәа иахәҭоу ахәшәқәеи амаругақәеи аныхтә маҭәахәқәеи, иара убас алаҵақәеи рыла реиқәыршәареи аҳақьымцәа русуратә ҭагылазаашьақәа реиӷьтәреи ирыдҳәалоу азҵаарақәа.
Едуард Быҭәба, ареспублика апедиатрцәа алархәны имҩаԥгаз инарҭбаау аусуратә еилатәара аихшьаалақәа ҟаҵо, аполиклиникақәа, араионтә хәышәтәырҭа хадақәеи ахшараиурҭақәеи русеицура аҩаӡара ашьҭыхра хымԥадатәиуп ҳәа иазгәеиҭеит.
