Адныҳәаларатә ажәахә аҿы Аԥсны агәабзиарахьчара аминистр Едуард Быҭәба ауаа ргәабзиара ахьчара, атәыла аҩныҵҟа адемографиатә ҭагылазаашьа аиӷьтәра, амедицинатә цхыраара аҩаӡара ашьҭыхра, уҳәа иахьа аԥсуа ҳәынҭқарра аҿы ахшыҩзышьҭра ду арҭоит ҳәа иазгәеиҭеит.

Аԥсны иҟоу Урыстәыла аус ацура Ахаҭарнакра  анапхгаҩы Дмитрии Федотов иазгәеиҭеит: «Ари апроект – ҳара иалкаау ауаа ацхыраара рыҭареи иҿыцу ахырхарҭақәа рынагӡареи анҳалшо аҿырԥштәқәа иреиуоуп. Сара даара гәахәарыла исыдыскылоит иахьа ҳара ҳахь Санткт-Петербургынтәи даахьааз ззанааҭдырра аҩаӡара акыр иҳараку аспециалист Екатерина Клочкова. Сара иахьынӡасдыруа лара иарбоу аобласт аҿы иреиӷьу аспециалистцәа дреиуоуп».

Аҵареи абызшәатә политикеи рминистр Инал Габлиа игәаанагарала, иахьа ахәыҷқәа рзы иҟоуҵар зылшо аҟынтәи зегьы ирыцку – уи ргәабзиара ахьчара ауп.

«Сара даара ибзиоуп ҳәа исыԥхьаӡоит афорум аусура аҳақьымцәа-аортопедцәа, ареабилитологцәа ахьадыԥхьалахаз. Урҭ зегьы ахәыҷы иҿиара заанаҵтәи астадиа аҿы игәабзиара ацхыраара аҭара зылшо роуп», - ҳәа иҳәеит иара.

Афорум апартниор хада, автономтә икоммерциатәым аиҿкаара «Физическая реабилитация» (Санкт-Петербург) Екатерина Клочкова  Аԥсныҟа  ҩынтә даахьеит, ареспублика ареабилитациатә усбарҭақәа зегьы дырҭааны игәалҭахьеит. Уи лгәаанагарала, иарбоу аҭаарақәа ранализ ала илоуз аԥышәеи адыррақәеи хра злоу ахархәара аҭазар ҟалоит.

«Сара еиуеиԥшым арегионқәа рҿы акыр аус зухьеит, иара убас Ҭаџьықьысҭан ақыҭақәа рыҿгьы. Убри аҟнытә, сара сгәаанагарала, иахәҭоу аҳақьымцәа ахьыҟам инамаданы, ацхырааразы анҭыҵ ацара ахьаҭаххо азы инаугӡар зылшо аҭаххрақәа ранализи ацхыраара амодели алкаатәуп»,  –  ҳәа илҳәеит Екатерина Клочкова.

Афорум аиҿкааҩ – Аԥсны иҟоу Урыстәыла аус ацура Ахаҭарнакреи агәабзиарахьчара Аминистрреи аҵара Аминистрреи, иара убас ахәыҷтәы фонд «Росток», Москватәи акультура-усуратә Центр «Москва Аҩны».

Афорум алахәылацәа рхыԥхьаӡараҿы иҟоуп – ахәышәтәратә бҩарҵәыра аганахьала аус зуа урыстәылатәи аҳақьымцәа-аспециалистцәа: Вадим Другов, Раджаб Сафаеви Пиотр Зелински-Баирони.