Нанҳәамза 14, 1992 шықәса рзы Иреиҳаӡоу Асовет аилатәара аҿы ҳара аконституциа ҿыц адкылара азы азакәан апроект ҳахәаԥшраны ҳаҟан. Аха убри амш аҽны иалагеит Аџьынџьтәылатәи еибашьра.
Жәаҳәарада, Аԥсны жәлар рџьынџьтәылатәи еибашьра иарбоу апроцесс ахатәы коррективақәа аланагалеит, еилкаау усуп, аконституциа ҿыц адкылара азҵаара аамҭак азы актуалра ацәыӡит. Аха аибашьра шынҵәазҵәҟьа ҳара ари азҵаара ҳаиҭазыхынҳәит. Зегьы раԥхьа агазеҭ «Бзыԥ» адаҟьақәа рҿы икьыԥхьыз аматериал алацәажәара апроцесс иалагӡаны атәылауа иаҳзаарҭиуан разгәаҭарақәеи ражәалагалақәеи. Иара убас, Америка инхо ҳдиаспора ахаҭарнакцәа, ахәҭакахьала, Инал Ҟазан, аконституциа ихатәы вариант ааишьҭит.
Иара убасҟанҵәҟьа, Владислав Григори-иԥа Арӡынба акомиссиа аԥиҵеит. Уи аилазаара иалалеит азиндырҩцәа Анри Џьергениа, Зураб Ачба, Баҭал Табаӷәуа. Урҭ иаашьҭыз ажәалагалақәеи иҟоу авариантқәеи реишьашәалара аус адырулон.
Убас ауп ишыҟалаз иахьа шәареи ҳареи иҳамоу, ҳаԥсҭазаараҿы ҳзықәныҟәо Аконституциа адкылара. Уи анрыдыркылоз, иазгәасҭар сҭахуп, сара заҵәык соуп пунктқәак рганахьала агәынамӡара аазырԥшыз. Уи моу, ӷәӷәалагьы урҭ сырҿагыланы сықәгылеит ҳәагьы уҳәаратәы иҟоуп. Аха уеизгьы усҟан уи ҳаицҿакны иҳадаҳкылеит. Сара иаразнак убри аекземплиар аҿы аилатәара иалахәыз зегьы рнапынҵақәа еизызгеит. Иазгәаҭатәуп, Владислав Григори-иԥа ила сшалагаз анапынҵақәа реизгара. Ашьҭахь сара ари аекземплиар амузеи иасҭеит.
Аконституциа - ари реалла имҩаԥысуа аԥсҭазаара иақәшәо иҟазар зыхәҭоу усшәҟәуп. Сара сгәаанагарала, аамҭа есымша ахаҭа иунарбоит атәыла зегьы зланхо ихадоу аусшәҟәы иалагалатәу аиҭакрақәа ртәы.
Уажәы уи аҩыза аамҭа шьақәгыланы иҟоуп. Аҳәынҭқарра Ахада Аслан Бжьаниа ила ишьақәыргылан аконституциатә комиссиа. Уи атәыла ихадоу аусшәҟәы аиҭакрақәа ралагалара азы ажәалагалақәа еиқәнаршәеит. Ахәҭакахьала, иасгәасымҭар алшом, урҭ ианаамҭаз, 1994 шықәсазы иҟасҵоз ажәалагалақәа акырџьара ишрықәшәо.
Аиҭакрақәеи ацҵақәеи злагалоу аусшәҟы ахәаԥшразы Аҳәынҭқарра Ахада иахь идәықәҵан. Иара дақәшаҳаҭхеит. Хара имгакәа иарбоу аусшәҟәы ашьақәырӷәӷәаразы Аԥсны Жәлар Реизара-Апарламент ахь инашьҭхоит».
