Убри инамаданы, Ахәаахәҭра-ааглыхратә Палата аинвестициатә ажәалагалақәа Реизакхьӡынҵа аԥҵаразы ажәалагала ҟанаҵеит. Иарбоу аизакхьӡынҵа аҿы аинвестор изы ихымԥадатәиу аинформациа зегьы арбахоит. Аизакхьӡынҵа аус адулара иалагахьеит. Ҷыдала ахшыҩзышьҭра аҭахоит аматериал азнагара ахаҭабзиара – уи ииашаны аекономикатә шьаҭакреи зҵакы гәылҭәаау аинвестициатә меморандуми иацклаԥшны аус зыдулоу абизнес-плани роуп.
Аизакхьӡанҵа аҿы иара убас аинвестор изы ихымԥадатәиу аинформациа анаҩс иарбахоит аус зуа реиԥш аусура ахацыркразы афинанстәра зҭаху анаплакқәагьы рпаспортқәа.
Ҭамила Мерцхәлаа лгәаанагарала, азеиԥш хықәкны иҟалароуп амҩақәҵатә хсаала аԥҵара – аҳәынҭқарра-хазхаҭалатәи апартниорра амеханизмқәа рыҿиара ацхыраара аҭара иазырхоу, аҩганктәи ауснагӡатәқәагьы уахь иналаҵаны, аусмҩаԥгатәқәа рыплан.
«Амҩақәҵаратә хсаала анагӡара аҟынтәи аеффект ҳреспублика азы ихәарҭоу, аеффективра злоу апроектқәа раԥҵареи рырҿиареи рырҭбаареи аҳасабала аинвестициақәа радыԥхьалареи рхархәареи алнаршоит. Ас еиԥш иҟоу аусмҩаԥгатәқәа ркомплекс аусуратә ҭыԥ ҿыцқәа раԥҵареи араионқәа рҿы аинфраструктура аҿиареи анаплак ҿыцқәа раартреи аекспорт адгылара аҭареи ашәахтәшәаҩцәа рхыԥхьаӡара аизырҳарала ашәахтәқәҵаратә база аҳәаақәа рырҭбаареи, иара убри ала иааизакны аекономика аҩаӡара ашьҭыхреи рахь икылнагоит», - ҳәа иазгәалҭеит Ахәаахәҭра-ааглыхратә Палата апрезидент Ҭамила Мерцхәлаа. Уи лгәаанагарала, хыхь иарбаз аусмҩаԥгатәқәа потенциалла аинвесторцәас иҟалараны иҟоу рҿаԥхьа Аԥсны аинвестициатә имиџь ашьҭыхреи аинвестициатә ӡбамҭақәа рыдкылара азы ихымԥадатәиу аинформациатә еиқәыршәара аԥҵареи алнаршоит.
Ҭамила Мерцхәлааа лажәақәа рыла, аинвестициатә ажәалагалақәа Реизакхӡынҵа аԥҵара азы аусуратә гәыԥ аилазаара Ахәаахәҭр-ааглыхратә Палата анаҩс аекономика Аминистрра, ашәахтәқәеи аизгақәеи рзы Аминистрра, Аҟәа ақалақь Ахадара, ареспублика араионқәа Рхадарақәа рхаҭарнакцәа, аҵарауаа, аекономистцәа, експертцәа алагалахароуп.
Ахәаахәҭра-ааглыхратә Палата аҿы иара убас еизгоу аинформациа аинвесторцәа рылаԥш аҿы иааиратәы еиқәзыршәаша аграфикатә дизаинерцәа радыԥхьалара хымԥадатәны ирыԥхьаӡоит.
Ахәҭакахьала, Илона Лакербаиа, иқәыргылоу азҵаарақәа рыӡбаразы аусеицура азхиара аарԥшуа, иарбоу апроцессқәа апрофильтә специалистцәа зегьы радыԥхьалара ахымԥадатәра шыҟоу азгәалҭеит.
