Аҟәа. Абҵарамза 22, 2022 шықәса. Аԥсныпресс. Аԥсны Жәлар Реизара - Апарламент аҟны имҩаԥысит абиуџьети акредиттә еиҿкаарақәеи ашәахтәқәеи афинансқәеи рзы апарламенттә Еилакы инарҭбаау аилатәара. Аилак ахантәаҩы Беслан Ҳалуашь напхгара зиҭоз аилатәараҟны иахәаԥшит азакәанапроектқәа: «Аԥсны Аҳәынҭқарра Атәанчаратә фонд 2023 шықәсазтәи абиуџьет», «Аԥсны Аҳәынҭқарра Арепатриациа афонд 2023 шықәсазтәи абиуџьет», «1992-1993 шш. Аԥсны Аџьынџьтәылатә еибашьра аинвалидцәа Аҳәынҭқарратә ибиуџьеттәым афонд 2023 шықәсазтәи абиуџьет», «Аԥсны Аҳәынҭқарра Амҩатә фонд 2023 шықәсазтәи абиуџьет», «Аԥсны Аҳәынҭқарра ихымԥадатәиу амедицианатә ԥгаԥсара Афонд 2023 шықәсазтәи абиуџьет», «Аԥсны Аҳәынҭқарра асоциалтә ԥгаԥсареи аџьа ахьчареи рфонд 2023 шықәсазтәи абиуџьет».
Аилак аилатәара иалахәын Апарламент адепутатцәа, Аԥсны Ахада Иубарҭа аҳәынҭқарра-зинтә усбарҭа аиҳабы Натела Ломиа, Аконтрольтә палата ахантәаҩы ихаҭыԥуаҩ Зураб Оҭырба, аҳәынҭқарратә ибиуџьеттәым афондқәа рнапхгаҩцәа.
Аилацәажара аихшьалақәа рыла арҭ азакәанапроектқәа изаамҭанытәиу Аԥсны Жәлар Реизара - Апарламент асессиа аилатәараҟны актәи аԥхьараан рыдкыларазы азыӡба рыдыркылеит.
