Афильм «Поиск» аҭыхра мҩаԥысит Григори Скворцов напхгара зиҭо Жәларбжьаратәи арра-мемориалтә проект «Ахьӡ архынҳәра» аҳәаақәа ирҭагӡаны, убри аан афинанстә цхыраара ҟанаҵеит Москва ақалақь Анапхгара, Аԥсны Ахәаахәҭра-Ааглыхратә Палата, аматериал техникатә цхыраара ҟанаҵеит Аԥсны атәылахьчара Аминистрра. Апроект «Ахьӡ архынҳәра» Аԥсны атәылауааи Ихьыԥшым Аҳәынҭқаррақәа Реиҩызара егьырҭ атәылақәеи рҟынтәи анемец фашистцәа иҭҟәаны иргаз, иршьыз ргәалашәара иазкуп, Аџьынџьтәылатәи еибшьра Дуӡӡа аҿы хабарда ибжьаӡыз  рыуацәеи рҭынхацәеи зыԥшаауа ацхыраара рыҭара иазырхоуп.

Уаанӡа иҟаз адыррақәа рыла, афильм «Поиск» алагаратә, абжьаратә, азеиԥштә ҵараиурҭақәа рҿы аҵара зҵои, иара убас Урыстәылазегьтәи ахәыҷтәы-қәыԥштә арра-патриоттә уаажәларратә еиҿкаара «Юнармия» алахәылацәеи рырбара азы  Урыстәылатәи Афедерациа Арбџьармчқәа рыла иабжьган. Иара убас афильм «Поиск» ақәҭых  Урыстәылатәи Афедерациа аҩныҵҟатәи аусқәа Рминистрра иатәу Санкт-Петербургтәи Ауниверситет ахь аҿар рпатриоттә ааӡара хықәкыс иҟаҵаны астудентцәа дырбаразы идәықәҵахеит.   Адокументалтә фильм «Поиск» Аԥснытәи аҳәынҭқарратә Университет астудентцәа ҩынтә идырбахеит. Иара убас идырбан Гал араион, Санкт-Петербург, Тирасполь инхо ауааԥсырагьы.

Афильм аҭыхреи анаҩстәи аус адулареи  2018  шықәса инаркны 2021 шықәсанӡа имҩаԥысуан.