Аҟәа. Абҵарамза 19, 2022 шықәса. Аԥсныпресс /Алексеи Шамба/. Абҵарамза 18 рзы Р. Гәымба ихьӡ зху Аԥснытәи аҳәынҭқарратә филармониа аҿы имҩаԥысит еицырдыруа апианинорҳәаҩы, П. И. Чаиковски ихьӡ зху XV Жәларбжьаратәи аконкурс аҿы аиаара згаз Дмитри Маслеев исолотә концерт мҩаԥысит.
Аконцерт амҩаԥгаҩ, амузыкадырҩы Есма Џьениа Урыстәылатәи Афедерациа акультура аминистр Ольга Лиубимова иаалышьҭыз адныҳәаларатә цҳамҭа даԥхьеит. Уаҟа, ахәҭакахьала иазгәаҭоуп:
«Урыстәылеи Аԥсни ҭоурыхла ишьақәгылахьоу акультуратә партниорра рыбжьоуп, урҭ аизыҟазаашьақәа аҳаҭырқәҵареи иаҳзеиԥшу аҭынха акультуратә традициақәа реиқәырхара ала ишьаҭаркуп. Агәра ганы сыҟоуп, ҳаԥхьаҟа ҳажәларқәа ирыбжьоу аимабзиаратә еизыҟазаашьақәа рыҿиареи рырӷәӷәареи иацхраауа акультуратә еимадара ишацҵахо».
Аконцерт х-ҟәшак рыла ишьақәгылан. Актәи аҟәша аҿы апианинорҳәаҩы Бетховен исонатақәа ҩба – №8 ("Патетическая") и №7 ("Буря") наигӡеит. Амузыкант акомпозитор дуӡӡа ирҿиамҭақәа ирыҵоу аҵакы, аенергиа, аритм зеиӷьаҟам ала аарԥшра илиршеит.
Аҩбатәи аҟәша аҿы инагӡан П. Чаиковски ицикл «Ашықәс аамҭақәа» аҟынтәи хә-рҿиамҭак. Шәагаала мыцхәы идуум, аха иҵаулоу аҵакы змоу, ухызхуа абжьы зхоу арҭ апиесақәа рлиризм ааиртит Дмитри Маслеев.
Аҵыхәтәантәи аҟәша аҿы апианинорҳәаҩы С. Рахманинов аҩбатәи исоната аирҳәеит. Ахәмарра аамҭак ала иаанарԥшуан агәжәажәара, алакҩакрада, азгәышьра, ахәыцра аҭанагалара.
Атехника ахкқәа зегьы набыцра амамкәа азҟазара, астиль анырра, уҳәа апианинорҳәаҩы иааирԥшуаз иҟазара иабзоураны азыӡырҩцәеи ахәаԥшцәеи атеатр аҿы иҟоушәа, ахҭысқәеи иҿыцу адиалогқәеи ацәаныррақәеи ахьыҟоу, утәызтәуа аспектакль иахәаԥшуашәа ацәанырра роуан.
Аконцерт мҩаԥысит Урыстәылатәи Афедерациеи Аԥсны Аҳәынҭқарреи рыбжьара акультура аусхкы аҿы традициала ишьақәгылаз аиҩызаратә усеицура адгылара аҭареи арӷәӷәареи иазырхоу, апроект «Аԥсни Урыстәылеи реимадаратә акультуратә усмҩаԥгатәқәа» рҳәаақәа ирҭагӡаны имҩаԥысит.
