Аҟәа. Абҵарамза 10, 2022 шықәса. Аԥсныпресс. Аԥсны агәабзиарахьчара аминистр Едуард Быҭәба аԥыза-министр Алеқсандр Анқәаб Москваҟа иусуратә ҭаара аихшьаалақәа рзы адырра ииҭеит, ҳәа адырра ҟанаҵоит аминистрцәа Реилазаара апресс-маҵзура.
Аԥсны агәабзиарахьчара Аминистрра ахаҭарнакцәа Урыстәылатәи Афедерациа асанитар-епидемиологиатә Маҵзура 100-шықәса ахыҵра иазкыз аныҳәатә усмҩаԥгатәқәа рхы аладырхәит.
Едуард Быҭәбеи Урыстәыла Ахархәарахылаԥшра Аусбарҭа анапхгаҩы Анна Поповеи реиԥылара аҿы ааигәа аусеицуразы знапаҵыҩра мҩаԥгаз аусеицуразы аиқәшаҳаҭра аҳәаақәа ирҭагӡаны имҩаԥысуа аусмҩаԥгатәқәа ирылацәажәеит.
Аминистр иусуратә ҭаара иалагӡаны Урыстәыла агәабзиарахьчара аминистр актәи ихаҭыԥуаҩ Виктор Фисенко иԥылара мҩаԥысит.
Ирылацәажәеит, иагьеиқәшаҳаҭхеит Аԥсны акардиологиатә маҵзура аусура аиӷьтәра аҿы ацхыраара иадҳәалоу азҵаарақәа рыла: урыстәылатәи апрофилтә специалистцәа иарбоу амаҵзура акадртә потенциали атехникатә лшарақәеи раудит мҩаԥыргоит, аԥснытәи рколлегацәа рыцырхырааны агәы ачымазарақәа змоу ауаа астациаонар аҿы амедицинатә цхыраара рыҭара азы рмаршрутизациа аиҿкаара мҩаԥыргоит.
Аԥыза-министр агәабзиарахьчара аминистр Едуард Быҭәба урыстәылатәи рколлегацәеи дареи рыбжьара апрофессионалтә еимадара ацҵареи агәабзиарахьчара аусхкы аҿы ирыбжьарҵаз аҩганктәи аиқәшаҳаҭрақәа рҳәаақәа ирҭагӡаны аусмҩаԥгатәқәа реицынагӡареи алыршара азы анапынҵақәа ииҭеит.
