Иааизакны уахәаԥшуазар, иааиуа хы-шықәса рзы аиқәшаҳаҭра анагӡара азы иаҭаххоит 22 млрд. мааҭ.  15,4 млрд.мааҭ рҟынӡа инаӡо урҭ рыхәҭак Урыстәылатәи Афедерациа биуџьет аҟынтәи иазоужьхоит, иаанхаз 6,7 млрд. мааҭ – арезервтә фонд аҟынтәи. Аԥаратә хархәагақәа реиҳарак ареспублика аенергосистема амодернизациа, иара убас абиуџьет аҟынтәи аԥара зауа,  аекономика ихадоу аусхкқәа:  ақыҭанхамҩа, ааглыхра, атуризм, уҳәа адгылара рыҭара ахь идәықәҵахоит.  Апрограмма анагӡара аҳәаақәа ирҭагӡаны абизнес маҷ анаплакқәа аҳәынҭқарра аҟынтәи акредитқәеи асубсидиақәеи роулар алшоит, урыстәылатәи аиқәыршәагақәа раахәараан ироуз ахарџь ахарҭәааразы алшара рзаԥҵахар алшоит.

Аиқәшаҳаҭра мҩаԥысит ҳазҭоу ашықәс, нанҳәамза азы. Уажәазы аиқәшаҳаҭра аратификациа азы азакәан апроект ахәаԥшразы Аԥсны Аҳәынҭқарра Ахада Иусбарҭа ахь идәқәҵоуп.

Урыстәыла аганахьала аусшәҟәы ақәыршаҳаҭра аиуит апрофилтә хылаԥшырҭақәа зегьы рыҟны: афинансқәа Рминистр, аџьеи асоциалтә хьчареи Рминистрра, ааглыхреи ахәаахәҭреи Рминистрра, ақыҭанхамҩа Аминистрра, агәабзиарахьчара Аминистрра, ашәарҭадаразы афадералтә Маҵзуреи аҩныҵҟатәи аусқәа Рминистрреи рҿы. 

Аиқәшаҳаҭра азинмчы аиуоит аратификациа амҩаԥгареи аҩ-ҳәынҭқаррак рыдәныҟатәи аусқәа Рминистррақәа рыбжьара аусшәҟәқәа реимадареи ашьҭахь. Уи ҳазҭоу ашықәс ԥхынҷкәынмзазы имҩаԥысраны иҟоуп.