Аҟәа. Абҵарамза 4, 2022 шықәса. Аԥсныпресс. Абҵарамза 6, асааҭ 13:00 рзы, Анцәа дзыхшаз Ацқьа Мариа Лылацәеиқәыԥсара ахьӡ зху Мықәтәи аныхабаа аҿы Сретентәи аберҭыԥ ахори Аԥснытәи аҳәынҭқарратә хортә капеллеи ргәыҳалалратә концерт мҩаԥысраны иҟоуп.
Аԥснытәи Аиашахаҵаратә Уахәама Аиҳабы аиереи Висарион (Аԥлиа) ареспублика ауааԥсыра ари агәыҳалалратә концерт иаҭаарц азы ааԥхьара ҟаиҵеит. Аныхабаа аҿы асадаҟы аизгара азы аиашьыкь ргылахоит. Еизгахо аԥаратә хархәагақәа зегьы ианаамҭаз Аԥсны адинхаҵатә ԥсҭазаара иацентр хаданы иҟаз ауникалра злоу ақьырсиантә культура абаҟа - Мықәтәи аныхабаа аҿы имҩаԥысуа аиҭашьақәыргыларатә усурақәа рынагӡара азы идәықәҵахоит.
Сретентәи аныхабаа ахор – адунеи зегьы аҿы еицырдыруа арҿиаратә коллектив ауп. Уи напхгара аиҭоит Урыстәыла зҽаԥсазтәыз артист Никон Жила. Акыр шықәса инеиԥынкыланы ахор азыӡырҩцәа ирызнанагоит ашедеврқәа реиԥш зынӡа ааигәа иаԥҵоу адоуҳатә музыка арҿиамҭақәа, урҭ абзиабареи агәыҳалалреи ақьиареи, уҳәа зеиӷьаҟам аидеиақәа рыҟазаареи рнымҵәареи дырҵабыргуеит. Сретентәи Аныхабаа аҿы инеиԥынкыланы имҩаԥысуа Анцәа имҵаныҳәарақәа рылахәхара анаҩс, ахор Москватәи Кремль имҩаԥысло аныҳәатә қьырсиантә усмҩаԥгатәқәа рҿы иқәгылоит, жәларбжьаратәи амузыкатә конкурсқәеи Урыстәылатәи Аиашахаҵаратә Уахәама амиссионертә ныҟәарақәеи ирылахәхоит.
