Урыстәылатәи Анаукақәа Ракадемиа иатәу аҭоурыхҭҵааразы Санкт-Петербургтәи Аинститут адиректор Алексеи Сиренов Зураб Џьапуа иҭабуп ҳәа еиҳәеит Аԥсны Анаукақәа Ракадемиа 25-шықәса ахыҵра аиубилеитә усмҩаԥгатәқәа рылахәхара азы ааԥхьара ахьиҭаз.

«Ҳаҭыр ду зқәу сколлегацәа, аҩызцәа, сара сзы Аԥсны Анаукақәа Ракадемиа 25-шықәса ахыҵра иадҳәаланы имҩаԥысуа аиубилеитә усмҩаԥгатәқәа рылахәхара акырӡа аҵак ду амоуп, акыргьы гәахәара дула исыдыскылоит уи. Ҳара ҳазгьы ари аусшәҟәы анапаҵаҩра акыр аанагоит., избан акәзар уи ҳаҭҵаарақәа аҳәаақәа арҭбаауеит, ҳусеицура аперспектива дуқәа анаҭоит. Даараӡа ииашаны иарбоуп ҳара ҳперспективақәа. Уи ҵабыргны Аԥсны аҵарауаа ҿарацәа – аҭоурыхҭҵаара иазааигәоу анаукақәа, афилологиа, аетнографиа, уҳәа знапы алаку аҭоурыхдырыҩцәа рзы алшара бзиақәа рзаԥнаҵоит. Аҭоурых, ишдыру еиԥш, егьырҭ анаукақәа, аетнографиа, афилологиа акыр иазааигәоуп. Аиқәшаҳаҭра аԥснытәи аҵарауаа рзы петербургтәи архивқәа рколлекциа рыла аус ауреи имҩаԥыргаз аҭҵаарақәа рылҵшәақәа ҳинститут аҿы рылацәажәареи  рзы алшара аԥнаҵоит. Ҳара ҳазхиоуп, гәахәара дулагьы ҳхы алаҳархәуеит анаука-ҵарадырратә процесс»,- ҳәа иҳәеит Алексеи Сиренов.

Аиқәшаҳаҭра анапаҵыҩра анымҩаԥыс ашьҭахь, аганқәа агәаларшәагатә ҳамҭақәа еимырдеит.