Аҟәа. Абҵарамза 3, 2022 шықәса. Аԥсныпресс. Аԥснытәи аҭаҷкәымҟьаҩы Харитон Агрба (9-0, КО 5) абҵарамза 19 рзы Екатеринбург ақалақь аҿы аверсиақәа WBA, IBF рыла абжьарабжатә капантә категориа аҿы амаҟақәа заухьоу Намибиа аҟынтәи аспортсмен Џьулиус Индонго (24-6, КО 13) диндаҭлараны дыҟоуп, ҳәа иаанацҳауеит Аԥсны аҿари аспорти русқәа рзы аҳәынҭқарратә Еилакы.
Харитон Агрба – жәларбжьаратәи акласс иаҵанакуа аспорт азҟаза, аҭаҷкәымҟьара азы адунеи Ахраҿа араӡнытә аԥхьахәгаҩ, Европатәи ахәмаррақәа араӡнытә аԥхьахәгаҩ, Урыстәыла ачемпионатқәа ҩынтәны ачемпион, астудентцәа рыбжьара аҭаҷкәымҟьара азы адунеи ҩынтәны ачемпион, атитулқәа WBA Fedecaribe, WBA Continental, IBF European, Евразиатәи абоксиортә парламент ианашьоуп, «Интерконтиненталтә ахраҿа» иоухьеит. 2019 шықәсазы ипрофессионалтә мҩа алагара инаркны иара инаигӡахьеит аиндаҭларақәа жәба, зегьы рҿы аиааирақәа игеит.
Харитон Агрба уажәаԥхьа имҩаԥигаз аиндаҭлара ҳазҭоу ашықәс лаҵарамзазы имҩаԥысит. Араҟа уи аӡбаҩцәа еицҿакны ирыдыркылаз аӡбамҭа ала Авак Узлиан дииааит, ЕВР (Eurasian Boxing Parliament) ачемпион ититул ианашьахеит.
Џьулиус Индонго деицырдыруеит ԥхынҷкәымза, 2016 шықәсазы имҩаԥигаз аиндаҭлара ала. Усҟан уи Едуард Троиановски дииааит. Уи асенсациатә хҭысны иԥхьаӡахеит. Убасҟан Намибиатәи аспортсмен урыстәылатәи аспортсмен амаҟа IBF имихит. Уи ашьҭахь имҩаԥгаз аиндаҭлара аҿы иара Великобританиа имҩаԥгаз аиндаҭлара аҿы Рики Бернс дииааины атитулқәа WBA, IBF еидикылеит. Анаҩс, Џьулиус Индонго адунеи ачемпион наӡа ихьӡ аиуразы актәи абжьарабжатә капантә категориа аҿы америкатәи аспортсмен Теренс Кроуфорд. диеиндаҭлеит. Аха усҟантәи аиндаҭлара аҿы аиааира игеит Теренс Кроуфорд – ахԥатәи араунд аҿы Џьулиус Индонго икариера аҿы раԥхьаӡа акәны даҵахеит. Уи аҵыхәтәантәи аиндаҭлара ҳазҭоу ашықәс ԥхынгәымза азы Узбекьысҭан имҩаԥигеит, араҟа иара акәаҭалақәа рыла Мирзакамол Нематов диаҵахеит.
