Игор Мураҭ-иԥа Ахба Аԥсны Аҳәынҭқарра иналукааша аҳәынҭқарратә усзуҩ, адипломат, Урыстәылатәи Афедерациаҟны Аԥсны Аҳәынҭқарра Аҷыдалкаатә Зинмчы змоу Ацҳаражәҳәаҩ.

Игор Мураҭ-иԥа Ахба диит жәабранмза 5, 1949 шықәсазы Аҟәа. Ломоносов ихьӡ зху Москватәи Аҳәынҭқарратә университет аҿы азиндырратә ҵара иоуит, СССР аҭҵаарадыррақәа Ракадемиа аҳәынҭқарреи азини Ринститут аспирантура далгеит. 1992-1993 шықәсқәа рзтәи Аԥсны Жәлар Рџьынџьтәылатә еибашьра аан Игор Мураҭ-иԥа иаԥиҵеит, дахагылеит Аԥсны Аҳәынҭқарра ганрацәала ацхыраара аҭаразы аоперативтә штаб. 2004 шықәсазы Аԥсны адәныҟатәи аусқәа рминистрра напхгара аиҭон.

Уи идипломатиатә усура адаҟьа ҷыда аурыс-аԥсуа еизыҟазаашьақәа ирыдҳәалоуп. Абҵарамза 14, 2008 шықәса рзы Игор Мураҭ-иԥа Урыстәылатәи Афедерациааҿы Аԥсны Аҳәынҭқарра Раԥхьатәи Аҷыдалкаатә Зинмчы змоу Цҳаражәҳәаҩыс дҟаҵан. Ари амаҵураҿы иара жәаха шықәса инареиҳаны дыҟан, аҳәынҭқаррабжьаратә еинырра аҿиареи аҩ-тәылак рыбжьара аиҩызаратә еимадарақәа рырӷәӷәареи рҿы илагала дууп. 2021 шықәса ԥхынҷкәынмзазы Игор Мураҭ-иԥа Евразиатәи аинтеграциа азҵаарақәа рзы Аԥсны адәныҟатәи аусқәа рминистрра ахаҭарнак ҷдас дҟаҵан.

Аԥсны Аҳәынҭқарра аҿаԥхьа илшамҭақәа рзы Игорь Мураҭ-иԥа Ахба «Ахьӡ-Аԥша» аорденқәа II, III аҩаӡарақәа ианашьан, «Аԥсны аҳәынҭқарра адипломатиатә маҵзура Зҽаԥсазтәыз аусзуҩ» ҳәа аҳаҭыртә хьӡы ихҵан. Жәларбжьаратәи аусеицура аҿиараҿы илагалазы иара ианашьан Урыстәылатәи Афедерациа адәныҟатәи аусқәа Рминистрра адырга «Жәларбжьаратәи аусеицураҿы илагалазы».