Аиԥылараан ирылацәажәан Урыстәылатәи аомбудсменцәа аус рыцуреи азакәанԥҵара аиӷьтәреи рызҵаарақәа, иара убас атәылауаа рзинқәа рыхьчареи Урыстәыла Ацҳаражәҳәарҭа аус ацуреи рыпрактикатә аспектқәа.

«Иахьа Азинмч змоу Аппарати Урыстәыла Ацҳаражәҳәарҭеи рыбжьара хра злоу аусуратә еинырра шьақәгылеит. Урыстәылатәи аган атәылауаа иҟарҵо ааԥхьарақәа ирласны ирызхьаԥшуеит», - ҳәа азгәалҭеит Анас Кьышьмариа.

Аомбудсмен лажәақәа рыла, Аппарат аусзуҩцәа иааиԥмырҟьаӡакәа наԥшыҩцәак раҳасабала аӡбаратә еилатәарақәа ирылахәуп, уи атәылауаа рзинқәа рыхьчареи аӡбаратә усеилыргарақәа рыҩаӡара аизырҳареи иацхраауеит.

Иара убасгьы ирылацәажәеит ҩ-тәылауаҩрак змоу ауааԥсыра зыдҵаало амазаратә, акоммерциатә, абзазаратә еимакқәа ирыдҳәало азҵаарақәа. Кьышьмариа ишазгәалҭаз ала, арҭ рҩызцәа аҭагылазаашьақәа раан Азинмч змоу Аппарат Урыстәыла Ацҳаражәҳәарҭа аус ацнауеит азинтә ӡбамҭақәа рыԥшааразы.

Виачеслав Гладков Азинмч змоу Аппарат аусура ахә ҳаракны ишьеит, уи аусзуҩцәа рзанааҭдырра азгәеиҭеит.

«Ауаҩы изинқәа Рыхьчаразы Азинмчы змоу Аппарат аҿы аус руеит ауаа апрактикатә цхыраара рыҭара иазхиоу, ззанааҭдырра ҳараку азиндырыҩцәа», — иҳәеит ацҳаражәҳәаҩ.