Изаҭахузеи онлаин-кассақәа, ари асистема алагалара Аԥсны аекономика ишацхраауа, уи ахархәаҩцәа ирнаҭо атәы Sputnik Аԥсны аинтервиу аҭо еиҭеиҳәеит Урыстәыла Афедералтә шәахтә маҵзура аиҳабы Даниил Егоров.
Аԥсны онлаин-кассақәа ралагаларазы апилоттә проект хацыркхеит рашәарамза 1 азы. Аԥсни Урыстәылеи ирыбжьарҵаз аиқәшаҳаҭра аҳәаақәа ирҭагӡаны Урыстәыла Аԥснытәи рколлегацәа ҳаамҭазтәи агәаҭара-кассатә техника рнаҭеит, апрограмматә аалыҵ атестқәа рзыҟаҵара иацхраауеит, атехникатә цхыраара рнаҭоит.
Ари иуадаҩу аинфраструктуратә проектқәа ируакуп. Онлаин-кассақәа аҭахуп ииашоу ашәахтәқәҵара алыршаразы, анаҩс еизгоу аԥарақәа еиуеиԥшым азҵаарақәа рыӡбара иазырхахоит азгәеиҭеит Урыстәыла Афедералтә шәахтә маҵзура аиҳабы Даниил Егоров.
Даниил Егоров ҿырԥштәыс иааигеит Урыстәылатәи аԥышәа. Ари асистема алагалара ашьҭахь ахарџьқәа рымҽхак 40% илаҟәит. Уи адагьы онлаин-кассақәа ахархәаҩ изинқәа рыхьчара иазырхоуп, ианаҭахха атауар азы аелектронтә чек имазаауеит.
Онлаин-кассақәа ралагалара алыршахеит Аԥсны ашәахтәқәеи аизгақәеи рминистрреи Урыстәылатәи Афедералтә шәахтә маҵзуреи ирыбжьарҵаз аиқәшаҳаҭра аҳәаақәа ирҭагӡаны, аусурақәа 2026-2027 шықәсқәа рзы етап-етапла имҩаԥыслоит. Актәи аетап аан ишьақәдыргылоит 1000 аппарат.
