Аҟәа. Жьҭаарамза 31, 2022 шықәса. Аԥсныпресс. Аԥсны еизгоу акоманда CONIFA аверсиа ала ашьапылампыл азы Европа Ахраҿагара 2023 алахәхара азы аҽазыҟаҵарақәа ирхысуеит. Абри азы адырра Аԥсныпресс ахь иҟаиҵеит Аԥсны ашьапылампыл Афедерациа апрезидент Ҭарашь Ҳагба.
CONIFA аверсиа ала ашьапылампыл азы Европа Ахраҿагара 2023 (EFC) мҩаԥысуеит 2023, рашәарамза 3 – 11 рзы Аҩадатәи Кипр аҿы.
Абҵарамза 9 рзы Ҭырқәтәылатәи Ареспублика Аҩадатәи Кипр аҳҭнықалақь Лефкош аҿы ConIFA европатәи аҟәша апрезидент Альберто Рискиои Аҩадатәи Кипр Ашьапылампылтә Федерациа апрезидент Ҳасан Сертоглуи алархәны апресс-конференциа мҩаԥгахоит. Араҟа урҭ Европатәи Ахраҿагара амҩаԥгара аҽазыҟаҵарақәа зегьы рымҩаԥысшьа атәы еиҭарҳәоит.
Иахьазы ишьақәырӷәӷәахеит CONIFA аверсиа ала ашьапылампыл азы Европа Ахраҿагара 2023 (EFC) алоготип, уи иаԥиҵеит CONIFA аконкурс аҿы аиааира згаз Стефано Вои (Stefano Voi). Алоготип адгалара мҩаԥган мшаԥымза, 2022 шықәсазы.
Заанаҵтәи адыррақәа рыла, EFC аҿы рхы аладырхәырц ауп 21 команда.
ConIFA ашьапылампыл азы Европа Ахраҿагара — аиҿкаара Confederation of Independent Football Associations ала уи алахәылара змам акомандақәа рзы имҩаԥнаго Европатәи ашьапылампылтә турнир ауп. Уи ҩы-шықәса рахь знык имҩаԥгахоит. Раԥхьаӡа акәны иара мҩаԥысит 2015 шықәсазы Венгриатәи ақалақь Дебрецен аҿы. Ҵабыргылатәи ачемпион – Аахыҵ Уаԥстәыла акоманда.
