Аҟәа. Жьҭаарамза 20, 2022 шықәса. Аԥсныпресс. Жьҭаарамза 20 рзы Аҟәатәи ақалақьтә Еизара аилатәара аҿы уи ахантәаҩы Иракли Харчлаа ҽҳәараанӡа изинмчы ааныжьра азы арзаҳал адгалара мҩаԥигеит.
Иҟаиҵаз аҳәамҭа аҿы иара иколлегацәа –ақалақьтә Еизара адепутатцәа аусураҿы ирҭоз адгылара азы ҭабуп ҳәа реиҳәеит, аилкаарагьы аадырԥшлым ҳәа агәыӷра шимоу иҳәеит.
«Ари сыӡбамҭа ишәа-иза исыдыскылеит, уи акыр зҵазкуа ҭагылазаашьоуп сара сзы. Убри аан сара сдепутаттә уалԥшьа анагӡара иацысҵоит, агәра ганы сыҟоуп аҟәаа ирыхәаша ала аусура сылсыршап ҳәа», - инаҵшьны иазгәеиҭеит Иракли Харчлаа.
Аҟәатәи ақалақьтә Еизара апресс-маҵзура иҟанаҵо адыррақәа рыла, адепутатцәа еицҿакны Иракли Харчлаа иԥхьатәара рыдыркылеит, анаҩс арегламент инақәыршәаны, Аизара ахантәаҩыс аҟаларазы акандидат иқәыргылара мҩаԥысит.
Алхратә биуллетень иалагалан адепутатцәа Дмитри Осиеи Давид Чхеиӡеи ркандидатурақәа.
Лаша Зарандиа, Роман Кәҭарбеи Аик Каленџьиани рыла зеилазаара шьақәгылоу аԥхьаӡаратә комиссиа имаӡоу абжьыҭира ашьҭахь абжьыҭира иалахәыз реиҳараҩык Дмири Осиа рыбжьы ирҭеит ҳәа адырра ҟарҵеит. Убас ала уи Аизара ахантәаҩыс далххеит.
Убасҵәҟьа, имаӡоу абжьыҭирала, Дмитри Осиа иажәалагалала ахантәаҩы ихаҭыԥуаҩыс далырхит Иракли Харчлаа.
