Аҟәа. Жьҭаарамза 20, 2022 шықәса. Аԥсныпресс. Аԥсны аресбилитациа азы аспециалистцәа Рассоциациа И. М. Сеченов ихьӡ зху Актәи Московатәи аҳәынҭқарратә медицинатә университет ахылаԥшрала имҩаԥысуаз аспорттә медицинеи ареабилитациеи рзы ХIV Жәларбжьаратәи асимпозиум рхы аладырхәит, ҳәа иаанацҳауеит агәабзиарахьчара Аминистрра.
Асимпозиум традициала ишышьақәгылаз ала, аспорттә медицинеи ареабилитациеи рҿы ицәырҵуа апроблемақәа рыӡбара азы апрофессионалтә еилацажәаразы зыхьӡ нагоу урыстәылатәии аҳәаанырцәтәии аспециалистцәа еиднакылоит.
Аспециалистцәа асимпозиум аҿы ралахәхара алыршахеит Аԥсны агәабзиарахьчара аминистр Едуард Быҭәбеи Урыстәылатәи амедицинатә Еилазаара апрезидент, И. М. Сеченов ихьӡ зху Актәи Московатәи аҳәынҭқарратә медицинатә университет аспорттә медицинеи амедицинатә реабилитациеи акафедра анапхгаҩы, амедицинатә реабилитациа аклиника адиректор, амедицинатә наукақәа рдоктор Евгени Ачкасови реиҿцәажәара иабзоурахеит.
