Виктор Санеев хынттәи аԥараҿы хынтә адунеи арекорд шьақәиргылахьан – 17,23 м, 17,39 м, 17,44 м.
Мехико имҩаԥсуаз Аолимпиада
1968 шықәсазы Аолимпиада ахь иааит адунеи иреиӷьу атлетцәа. Виктор Санеев Асовет Еидгыла ахьӡала иқәгылара шықәсык аҟара иҭагӡан.
Мехико имҩаԥысуаз Аолимпиада афинал аҿы еицлабрак иҭагӡаны адунеи арекорд ԥшьынтә ирҿыцын, уи наунагӡа атлетика лас аҭоурых ианылеит.
Аквалификациа аҿы италиатәи аспортсмен Џьузеппе Џьентиле иҿыцу адунеи арекорд шьақәиргылеит — 17 м. 10 см. Афинал актәи аҽазышәараҿы иараҵәҟьа уи аԥхьа ишьақәиргылаз арекорд даиааины иҿыцу арекорд шьақәиргылеит —17 м. 22 см. Афинал ахԥатәи аҽазышәара аҿы Виктор Санеев ари алҵшәа сантиметрак ала деиҳахоит. Ахәбатәи аҽазышәараҿы адунеи арекорд ҩаԥхьа ирҿыцуеит бразилиатәи аспортсмен Нелсон Пруденсио – 17 м. 27 см. Аҵыхәтәантәи афбатәи аҽазышәараҿы ауп аиааиратә аихшьаалатә кәаԥ аниргыло Виктор Санеев — 17 м. 39 см.
1969 шықәса, жьҭаарамза 17 рзы, Виктор Санеев раԥхьаӡа акәны Аолимпиада аҿы аиааира анига амш аҽны, Аҟәа ақалақь аҿы Виктор Санеев Ихраҿа агаразы аицлабрақәа мҩаԥысуан. Абри иара Ихраҿа аҿы аспортсмен 1972 шықәсазы иазԥхьагәаҭаз арекорд — 17 м. 44 см. шьақәиргылеит.
Иналукааша еихьӡарақәа рзы Виктор Санеев Ленин иорден ианашьахеит, 1983 шықәсазы Жәларбжьаратәи аолимпиатә Комитет ахьӡала иара аолимпиатә ҵысра аҿиара аҿы илагалазы араӡнытә орден ианашьахеит.
Аотлет икариера анхиркәша ашьҭахь Виктор Санеев аус иуан Қарҭ ақалақь, аспорттә еилазаара «Динамо» аппарат аҿы.
Асовет Еидгыла анхыбгала ашьҭахь иԥшәмаԥҳәыси иԥеи ицны Австралиаҟа нхара диасит. Араҟа иара раԥхьа ашкол аҿы абаҩарҵәыра арҵаҩыс аус иуан. Ԥыҭрак ашьҭахь иара аштат Аладатәи Уельс иҟаз аспорт Аинститут аҿы аԥаразы азыҟаҵаҩыс аусура иоуит. Сиднеи ақалақь аҿы дынхон.
Виктор Санеев ианиаамҭаз далгеит Асубтропикатә нхамҩазы Қырҭтәылатәи аинститути Қарҭтәи аҳәынҭқарратә университети, убри аҟнытә бзиа ибон инхарҭаҭыԥ иаҵанакуаз адгьыл аҿы асубтропикатә ҵиаақәа рааӡара алимонқәеи агреипфрутқәеи уахь иналаҵаны.
Аспортсмен иԥсҭазаара далҵит ажьырныҳәамза 3, 2022 шықәса рзы, анышә дамардеит жьҭаарамза 5 рзы Сиднеи ақалақь аҿы.
