Аҟәа. Жьҭаарамза 4, 2022 шықәса. Аԥсныпресс. Аԥсны Аҳәынҭқарра Ахәаахәҭра-ааглыхратә Палата Апрезидент Ҭамила Мерцхәлаа Германиа иҟоу Аԥсны Ахәаахәҭра-ааглыхратә Палата аофициалтә Хаҭарнак Вольфгангом Матцке напхгара зиҭо Германиатәи Афедеративтә Республика аҟынтәи аделегациа лыдылкылеит, ҳәа иаанацҳауеит Аԥсны Ахәаахәҭра-ааглыхратә Палата апресс-маҵзура.
Аиԥылараҿы ирылацәажәеит Аԥсны Ахаҭарнакра Германиа аусура атәы, Аԥсни Германиеи рбизнес-еилазаарақәа рыбжьара ахәаахәҭра-економикатә еизыҟазаашьақәа рыбжьаҵаразы иҟоу аспектқәа, уҳәа.
Ҭамила Мерцхәлаа аҳәаанырцә ареспублика аӡыргара иазку хыԥхьаӡара рацәала аусмҩаԥгатәқәа мҩаԥызго, аҩҳәынҭқаррак рбизнес-еилазаарақәа реизыҟазаашьақәа рыҿиара хықәкыс иҟаҵаны аусдкылаҩцәа реиԥыларақәа еиҿызкаауа Вольфганг Матцке иусура азгәалҭеит.
Ахәаахәҭра-ааглыхратә Палата Апрезидент илыҿцәажәо асасцәа аусдкылара, иара убас анемец технологиақәа рыла Аԥсны амедицинатә центр аартра аинвестициақәа ралагалара иадҳәалоу азҵаарақәа жәпакы ирылацәажәеит.
Убри инамаданы, Ахәаахәҭра-ааглыхратә Палата анапхгараҭара анемец делегациеи Аԥсны агәабзиарахьсара аминистр Едуард Быҭәбеи реиԥылара еиҿнакааит.
