Аҟәа. Жьҭаарамза 4, 2022 шықәса. Аԥсныпресс. Аԥыза-министр Алеқсандр Анқәаб, аԥыза-министр ихаҭыԥуаҩцәа Кристина Озгани Владимир Делбеи, шьаҭанкылатәи аргылара азы Аусбарҭа анапхгаҩы Ҭемыр Агрба Урыстәыла аекономикатә ҿиара ахаҭарнакцәа – иҷыдоу апрограммақәеи апроектқәеи рзы Адепартамент адиректор Антон Мельник, аминистр ицхырааҩ Михаил Мухортов ирԥылеит. Аиԥылара иара убас рхы аладырхәит Аԥсны иҟоу Урыстәылатәи Афедерациа Ацҳаражәҳәаҩ Михаил Шургалини Ацҳаражәҳәарҭа абжьгаҩ-ацҳаражәҳәаҩ Максим Литвинови.
Аганқәа ирылацәажәеит Аԥсны асоциал-економикатә ҿиара ацхыраара азы иаԥҵоу Аинвестициатә Программа ала аусмҩаԥгатәқәа рынагӡашьа, аҩтәылак рзакәанԥҵарақәа реишьашәалара, аенергетика, ареспублика абиуџьеттә сфера иаҵанакуа, хазы игоу акатегориақәа иреиуоу аусзуҩцәа руалафахәы рызшәара аицыфинанстәра, уҳәа ирыдҳәалоу азҵаарақәа жәпакы. Уаҵәы, жьҭаарамза 5 рзы ари аԥылара иацҵахоит.
