Аҟәа. Жьҭаарамза 4, 2022 шықәса. Аԥсныпресс. Аҳәынҭқарра Ахада»Аԥсны ашәҟәы шкәакәа» асоавторцәа, аҵарауаа Павел Флоренскии уи иԥшәмаԥҳәыс Татиана Шутовеи идикылеит.
Аҳәынҭқарра Ахада жьҭаарамза 4 рзы, ахәылбыҽха дидикылеит урыстәылатәи аҵарауаҩ, агеологиа-минералогиатә ҭҵаарадыррақәа рдоктор, апрофессор, Урыстәылатәи Иԥсабаратәу аҭҵаарадыррақәа ракадемиа академик, Урыстәыла Ашәҟәыҩҩцәа реидгыла, Аԥсны Ажурналистцәа реидгыла алахәҩыла Павел Флоренскии уи иԥшәмаԥҳәыс афилолог, Леон иорден занашьоу, Аԥсны Аџьынџьтәылатә еибашьраан москватәи агазеҭқәа жәпакы рыҟны арратә корреспондентс иҟаз Татиана Шутовеи.
Асасцәа аԥсшәа раҳәо, Аԥсны Ахада Аслан Бжьаниа аҵарауаа иҭабуп ҳәа реиҳәеит аԥсуа жәлар рҭоурыхи ркультуреи раларҵәараҟны рлагаламҭазы. «Ҳара ҳзы гәахәароуп арҭ аныҳәамшқәа раан шәахьҳадгылоу, жәашықәсала иҟазааит ас еиԥш иҟоу аиԥыларақәа», - ҳәа иазгәеиҭеит Аҳәынҭқарра Ахада.
Асасцәа Аҳәынҭқарра Ахада иҭабуп ҳәа иарҳәеит аиԥыларазы, иалацәажәеит ҳазҭагылоу аамҭазы рнапы злаку, иара убас аԥхьатәи рыгәҭакқәа ртәы. «Ҳара гәахәарыла Аԥсны амаҵ азаҳур ҳҭахын макьана», - ҳәа илҳәеит Татиана Шутова Аԥсны Ахада иԥылараан.
